मुलुकभर कोरोना संक्रमणको जोखिम बढेका घटना बाहिर आएसंगै वाणगंगा नगरपालिकामा जोखिम बढ्न सक्ने भएकाले बिहिबार बाहिरी आवागमन रोक्न चोकचोकमा प्रहरी तैनाथ भएसँगै कडाई गरिएको छ । बुधबार नगरपालिकाले बाहिरी आवागमन ठप्प पार्ने निर्णय लिएपछि आजबाट कुनै पनि नाकाबाट नगरमा प्रवेश गर्नेमाथि कडाई गरेको हो । सो निर्णय लागु भएसंगै विहिबार विहानैबाट नै नगरका सबै भित्री र बाहिरी सडकहरु सुनसान बनेका छन् ।
यसअघि लक डाउन भए पनि सवारीसाधनहरु फाट्टफुट्ट आवतजावत भइरहेका थिए । आजबाट भने प्रहरीले अत्यावश्यक काम बाहेक कोही कसैलाई पनि सडकमा हिँड्न दिएको छैन । नगरको यो निर्णयलाई कार्यान्वयन गर्न जीतपुरको ४ नंम्बर चोक, कोठी नदी, कोइली बनगाई, ओदारी लगायतका ठाउँमा प्रहरी परिचालन गरिएको इलाका प्रहरी कार्यालय पिपराका प्रहरी निरिक्षक आयूष प्रसाद जोशीले जानकारी दिए ।
नियम उलंघन गर्दै आवतजावत गर्नेलाई सोधपुछ गरी प्रहरीले फर्काउने काम पनि गरेको छ । यस्तै नगरका भित्री सडकहरुमा पनि निगरानी बढाइएको प्रहरीले जनाएको छ । प्रहरी निरिक्षक जोशीले यसलाई सामान्य रुपमा नलिन पनि सबैलाई अनुरोध गर्दै नियम उलंघनको छुट कसैलाई नभएको बताए ।
साथै सिमा नाकामा प्रहरीको साथसाथै जनप्रतिनिधि पनि खटिने नगरपालिकाले जनाएको छ । यस्तै नगरले एक स्थानीय तहबाट अर्को स्थानीय तहमा प्रवेशमा समेत कडाई गरेको छ । प्रहरीले विहान र साँझ मानिसहरु बढी बाहिर निस्कने भएकाले अत्यावश्यक काम बाहेक कसैलाई पनि बाहिर ननिस्कन अनुरोध गरेको छ । वाणगंगा नगरपालिका र कपिलवस्तु उद्योग बाणिज्य संघले खाद्यान्न, तरकारी, फलफुल, दूध र अन्य अत्यावश्यकीय सामाग्रीका पसललाई पनि विहान मात्र खुल्न दिने र दिउसो साँझ पूर्ण रुपमा बन्द गर्ने निर्णय भएका कारण बजार हिजो अस्तिको तुलनामा आज सुनसान भएको छ । यद्यपी अलपत्र भई पूर्वपश्चिम राजमार्ग हुँदै आएकाहरुलाई भने विशेष ब्यवस्था गरेर गन्तव्यमा जान दिइने बताइएको छ ।
