काठमाडौं : देशभर थप एक हजार ६ सय ६४ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयले मंगलबार साँझ सार्वजनिक गरेको विवरणअनुसार पछिल्लो २४ घन्टामा पिसिआर परीक्षणमा एक हजार पाँच सय २३ र एन्टिजेन परीक्षणमा एक सय ४१ जनामा संक्रमण देखिएको हो ।
यो अवधिमा नौ हजार एक सय १७ जनाको पिसिआर परीक्षण र तीन हजार एक सय पाँचजनाको एन्टिजेन परीक्षण गरिएको थियो ।
हाल देशभर ३५ हजार पाँच सय ९१ जना सक्रिय संक्रमित रहेका छन् । मंगलबार एक हजार सात सय ८६ जना कोरोना संक्रमणमुक्त भएका छन् ।
पछिल्लो २४ घन्टामा २० जना संक्रमितको मृत्यु भएको छ । हालसम्म मृत्यु हुने संक्रमितको संख्या १० हजार सात सय ५० पुगेको छ ।
