नेपाली कांग्रेसका महामन्त्री गगन थापाले प्रमुख तीन दलका नेताहरूलाई बिदाइ गर्नुपर्ने बताएका छन्।
आइतबार सामाजिक सञ्जालमा एक भिडिओ सन्देश जारी गर्दै उनले नेपाली कांग्रेस, नेकपा (एमाले) र नेकपा (माओवादी केन्द्र) का प्रमुख नेताहरूलाई नेतृत्वबाट बिदाइ गरेर संवादको नयाँ वातावरण प्रारम्भ गर्न अपिल गरेका हुन्।
१० वर्षदेखि शेरबहादुर देउवा, केपी शर्मा ओली र पुष्पकमल दाहाल ‘प्रचण्ड’ का बीचमा प्रधानमन्त्री पद घुमिरहेको र आजको समस्याको प्रमुख कारण यही रहेको थापाको भनाइ छ।
‘अझै पनि तपाईंहरू चेत्नुहुन्न? बिदाइ लिनुहुन्न? अझै पनि तपाईंहरूले उहाँहरूलाई हटाउनुपर्दैन? म सुन्छु तपाईंहरू अझै अधिवेशन, विशेष अधिवेशनको कुरा गर्दै हुनुहुन्छ,’ उनले भने।
मतदाताहरूले पार्टीहरूका प्रमुख फेर्न आग्रह गरिरहेको पनि थापाको भनाइ छ।
