म्यानचेस्टर सिटीले इङ्लिस प्रिमियर लिगमा लिड्स युनाइटेडविरुद्ध ३–२ को रोमाञ्चक जित दर्ता गरेको छ ।
शनिबार इत्तिहाद रंगशालामा घरेलु टोली सिटीलाई जित दिलाउन फिल फोडेनले २ तथा जोस्को ग्वार्डियोलले १ गोल गरे । लिड्सका लागि डोमिनिक क्याल्भर्ट लेविन र लुकास न्मेचाले १/१ गोल फर्काए ।
खेलको पहिलो मिनेटमै फोडेनको गोलमार्फत सिटीले अग्रता लिएको थियो । २५औँ मिनेटमा ग्वार्डियोलले टोलीको अग्रता दोब्बर बनाए ।
लेविनले ४९औँ मिनेटमा गोल गर्दा खेल २–१ को स्थितीमा आयो । ६८औँ मिनेटमा न्मेचाले लिड्सका लागि बराबरी गोल फर्काए । पेनाल्टी प्रहारलाई सिटीका गोलकिपर जियानलुइजी डोनारुम्माले बचाए पनि रिबाउन्डलाई न्मेचाले सहजै पोस्टको दिशा दिए । इन्जुरी समयमा फोडेनले व्यक्तिगत दोस्रो गोल गर्दै सिटीलाई रोमाञ्चक जित दिलाए ।
जितसँगै १३ खेलमा २५ अंक जोडेको सिटी दोस्रो स्थानमा उक्लिएको छ । पराजित लिड्स समान खेलबाट ११ अंकका साथ १८औँ स्थानमा छ ।
शनिबारै सम्पन्न अन्य खेलमा फुलहमले टोटनहमलाई २–१, न्युक्यासल युनाइटेडले एभरटनलाई ४–१, सन्डरल्यान्डले बर्नमाउथलाई ३–२ तथा ब्रेन्टफोर्डले बर्नेलीलाई ३–१ ले पराजित गरे ।
