कपिलबस्तु प्रहरीले पछिल्लो १० दिनमा करिब ५० लाखको अबैध मालसामान बरामद गरेको छ । भन्सार छली भित्राईएका तथा अबैधरुपमा भारत तर्फ लैजादै गरिएका बिभिन्न मालसामानहरु बरामद गरिएको हो । यसक्रममा प्रहरी बिभिन्न सथानमा रहेको ब्यापारीको गोदामहरुमा छापा समेत हानेको ब्यापारीहरु बताउछन । तस्करीलाई शुन्यमा झार्ने उद्देश्यकासाथ काम अघि बढाईएको प्रहरी उपरिक्षक मनोज कुमार यादवले बताए । एक सय २३ बोरा कालो मरिच सहित ३० लाख ८२ हजार आठसय अस्सी रुपैंया बराबरको भारतबाट भन्सार छली ल्याउँदै गरेको र नेपालबाट भारततर्फ लैजांदै गरेको सामान बरामद गरिएको कपिलबस्तुका प्रहरी उपरीक्षक मनोज कुमार यादवले जानकारी दिए । प्रहरीले कपिलबस्तुको मर्यादपुर, कृष्णनगर, रंगपुर लगायत ठाउँबाट उक्त परिमाणको अवैध सामान बरामद गरेको बिहिबार पत्रकार सम्मेलन गरि बरामद गरेका समानहरु सार्वजनिक गरेका छन् । प्रहरीले २२ लाख ६० हजार पांचसय बराबरको कालो मरिच, १२२ कार्टुन स्याउ, ५२ पेटी क्लोज अप, सहारा चुरोट २ पेटी, भोला ११ बोरा, फ्रेन लवली ३ पेटी, खुकुरी चुरोट ३६ पेटी, नुन २ बोरा, बिस्कुट १२ पोका, सेमई (मिठाई) २८ के.जी , छोडा ५ केजी, नरिवल ५ केजी, कम्मल १० थान, चिनी लगायतका मालसामान बरामद गरेको छ । जिल्ला सिमावर्ती क्षेत्रमा रहेका इलाका प्रहरी कार्यालयबाट खटिएका प्रहरीले अबैध मालसमान नियन्त्रणमा लिएको हो । सिमावर्ती क्षेत्रबाट बिनाभन्सार ल्याउदै गरेको अवैध मालसमानहरु प्रहरीलाई देखेपछि छाडेर तस्करहरु भागेका प्रहरीले जनाएको छ । बरामद सामानलाई कृष्णनगर भन्सार कार्यालयमा पठाइएको प्रहरी उपरिक्षक यादवले बताए । बरामद माल भन्सार चलान गरिएको जनाईएको छ । उता केही ब्यापारीहरुले आफुहरुको गोदाममा रहेको बिल सहीतको माललाई प्रहरीले छापमार शैलीमा जबरजस्ती लगेको आरोप लगाएका छन् ।
