समय हुदा काम नगरेर बसेका ठेकेदार हाल आएर समयमै काम नसक्ने ठेकेदारलाई सरकारले प्रकाउ तथा कारबाही गरेपछि कपिलवस्तुमा पनि ठेकेदारले पुरै सडकनै बन्द गरेर काम गर्न थालेका छन । कपिलवस्तुको सदरमुकाम तौलिहवादेखि जितपुर (चार नम्बर)सम्म जोड्ने तौलिहवा–जितपुर सडकखण्ड एक महिनाका लागि बन्द गरी यहाँका ठेकेदारले काम गर्न थालेका हुन । समय छदा काममा ढिलासुस्ती गरेका ठेकेदारले सरकारले चालेको कदमको डरले हाल आएर सडकनै बन्द गरी काम गर्न थालेको हुन । एक महिनासम्म सडक बन्द हुने भएपछि जितपुर तौलीहवा क्षेत्र आसपासका कृषक चिन्तित रहेका छन । खेतीपातीको समय रहेको र हाल आएर मल बिउबिजन ल्याउन तथा खेत खनजोत गर्न ट्रेक्टर आउन समेत गाह्रो हुने भएपछि यसपाली कसरी खेतीपाती गर्ने भनी चिन्ता लागेको बाणगंगा सिउटीका सुकदेव थारुले बताउछन । २०७५ पुस मसान्तसम्म काम सक्ने जिम्मा पाएको व्रज गुरु, डिवा र एम के ग्रुपले हाल आएर पानी पर्ने मौसमको बिचमा काम गर्दा काम पनि गुणस्तरीय नहुने नागरिक समाज कपिलवस्तुका अध्यक्ष दोलक बहादुर पछाइले यस बिषयमा आवश्यक छलफलपछि डेलिगेशन जाने तयारी रहेको बताए ।
सो समयमा डिभिजन सडक कार्यालय शिवपुर कपिलवस्तुको कार्यालयले उक्त बाटोको सट्टा बैकल्पिक बाटोको रूपमा गोरुसिङ्गे–तौलिहवा, बुङची–कोपवा–जहदी, पिपरा–प्रगतिनगर–ओदारीको बाटो प्रयोग गर्न यात्रु तथा सवारी धनीलाई आग्रह गरेको छ । सडक स्तरोन्नति गर्दै कालोपत्रे गरिने भएकाले एक महिनाका लागि सडक बन्द गरिएको डिभिजन सडक कार्यालय शिवपुर कपिलवस्तुका प्रमुख रमेशप्रसाद पौडेलले जानकारी दिए । पिच नभएको समयमा बाहेक आवश्यक ब्यवस्थापन गरी सडक समय सापेक्ष खोलिने पनि उनले बताए । खास गरेर जितपुर देखि तौलीहवासम्म बाटोमा ८ किलोमिटर बाटो कालोपत्रे बिझ्याउने अन्तीम तयारीमा रहेको बताइएको छ । कालोपत्रे गर्दा पुर्ण रुपमा सडक बन्द हुने बताउदै प्रमुख पौडेलले त्यो बाहेकको समयमा सवारी चलाउने प्रवन्ध मिलाइने समेत उनले बताए । एक लेनको उक्त सडक जीर्ण र साँघुरो हुँदा सवारीसाधन आवागमनमा कठिनाई भइरहेपछि स्तरोन्नति गर्न लागीएको हो । ‘जितपुर–तौलिहवा सडक हुलाकी सडक आयोजनाअन्तर्गत निर्माण थालिएको हो।’ गत मंसिरबाट निर्माण सुरु गरिएको सडक २० महिनामा पूरा गर्ने सम्झौता भएको छ । तौलिहवाबाट जितपुर चारनम्बर, बुटवल, पोखरा, काठमाडौंका लागि छोटो दूरीको सडकको रूपमा रहेको उक्त सडक बन्द भएपछि यात्रुहरूले लामो दूरीको यात्रा गर्नुपर्ने बाध्यता भएको छ ।
