कफी र काफियामा सुनिए लोकेन्द्र–सञ्जय

मन भरी बोकेर त्रास र डरहरुलाई
बढाएको छु अगाडि सफरहरुलाई

साच्चै घमण्ड को मज्जा बल्ल हुन्थ्यो
रोक्न सके मृत्युका यी लस्करहरुलाई

यसकारण उ अचेल चस्मा लगाईरहन्छ
लुकाउनु छ सडकमा नजरहरुलाई

गाउँमा सडक भित्रीयो बिजुली भित्रीयो
ईष्र्या लागेको छ अचेल शहरहरुलाई

ओईलिएर फुल एक दिन अवश्य झर्छ
किन बुझाउदैन कोहि भ्रमरहरुलाई

अविरल अविरल बाटो देखाईरहेछ
र पनि छोडी हिडछ नदि बगरहरुलाई

जति नै मेहनत गरेर कसि लगाए पनि
सिधा बनाउन सकिएन पुच्छरहरुलाई

सञ्जय भट्टराई साठीको दशकको सुरुआतदेखि गजल साहित्यमा कलम चलाउँदै आइरहेका स्रस्टा हुन् । पेशाले अध्यापन गर्ने उनी स्थानीय एफएम रेडियोमा गजलसम्बन्धी कार्यक्रम पनि चलाउँछन् ।

बञ्जारा दमक झापाका युवा स्रस्टा हुन् । ५० को दशकदेखि नै नेपाली गजल साहित्यमा कलम चलाउँदै आएका बन्जारा एफएम रेडियो र सामाजिक संजाल प्रचलनमा आउनु अगाडि नेपालमा अत्यन्तै लोकप्रिय रहेको हवाइ साहित्यका एउटा अभियन्ता पनि हुन् । झापाबाट उनको सम्पादनमा निस्कने साहित्य आकाश हवाइ पत्रिका हुलाकी ठेगानामार्फत देशैभरका स्रस्टाको घरघरमा पुग्थ्यो ।

अहिले सामाजिक सञ्जाल फेसबुक र ट्वीटरले लिएको स्थान त्यतिबेला हवाइ पत्रिकाले ओगटेको थियो । बञ्जाराको ‘आँखाभरि सपना र जैतुन’ गजल श्रृंखला पनि प्रकाशित छन् । सिर्जन साहित्य प्रतिष्ठानले आयोजना गरेको कार्यक्रममा वाचन भएका गजलबारे गोविन्दराज विनोदी, डा. मतिप्रसाद ढकाल, गोकुल सापकोटा, शंकर अधिकारी र सुजन अधिकारीले बोले ।

गोविन्दराज विनोदी र धनराज गिरीको युगल गजल वाचनमा २०७४ साउनबाट सुरु भएको यो श्रृंखलामा अहिलेसम्म ११ जोडी गजलकारले गजल सुनाएका छन् ।