गृहपृष्ठ खबर फाष्टट्र्याकमा सेनाको योजना

फाष्टट्र्याकमा सेनाको योजना

प्रकाशित मिति:

काठमाडौँ-  निजगढ द्रुतमार्गमा ४ अर्ब ३३ करोड लागतका तीनवटा आधुनिक सुरुङमार्ग (टनेल) बनाउने प्रस्ताव अघि सारेको छ।

सेनाले महादेव डाँडा, धेद्रे र लेनडाँडामा तीनवटा सुरुङमार्गको प्रस्ताव अघि सारेको हो।

आयोजनाका प्रमुख प्राविधिक उपरथी योगेन्द्रबहादुर खाँडले महादेव डाँडामा ३-३ किलोमिटर (टनेल १), धेद्रे मा १.३७ किलोमिटर (टनेल २) र लेनडाँडामा १.४ किलोमिटर (टनेल ३) का टनेल बनाउने प्रस्ताव अघि सारेको बताए।

उनका अनुसार, टनेल निर्माणका कारण पूर्व अनुमानित लागत बढेपनि यसले दीर्घकालमा परियोजनालाई नै फलदायी हुनेछ। ‘टनेल निर्माणले १९ वटा साना-मझौला-ठुला पुलको सख्या घट्नेछ’ उपरथी खाँडले भने, ‘यस्तै ३.४५ किलोमिटर सडकको लम्बाई घटनुका साथै यात्रामा पाँच मिनेट समयको समेत बचत हुनेछ।’

सरकारले २१ बैशाख २०७४ मा मन्त्रिपरिषदबाट निर्णय गरेर राष्ट्रिय गौरबको आयोजनामध्येको एक काठमाडौँ–निजगढ द्रुतमार्ग बनाउने जिम्मा नेपाली सेनालाई दिने निर्णय गरेको थियो। सेनाले सोही वर्ष साउन २७ मा कामको औपचारिक जिम्मा पाएको हो।

काठमाडौँलाई पूर्व तराई/मधेशसँग जोडने ७६.३ किलोमिटर लामो चारलेनको सडक हाल निर्माणाधिन अवस्थामा छ। यो द्रुतमार्गले ललितपुरको ७.९, काठमाडौँ ४, मकवानपुर ५६.७ र बाराको ७.६ किलोमिटर छुनेछ।

सेनाले बिहीबार सैनिक मुख्यालयमा पत्रकार सम्मेलन गरेर हालसम्मको प्रगति र भावी रणनीतिकका बिषयमा जानकारी गराएको हो। उसका अनुसार, सन २००८ मा एशियाली विकास बैँकले बनाएको सम्भाब्यता अध्ययनकै आधारमा काम भइरहेको छ।

द्रुतमार्ग आयोजनाले २९ भदौमा कोरियाली कम्पनी सुसुङ्गलाई बिस्तृत परियोजना प्रतिवेदन बनाउन परामर्शदाताका रुपमा छनौट गरेको थियो। परामर्श दाताले ४ महिनामा प्रतिवेदन दिएपछि सेनाले सोही अनुसार काम अघि बढाउने छ।

उपरथी खाँडले सेनाले तोकिएको ४ वर्षमै द्रुतमार्ग सरकारलाई हस्तानान्तरण गर्ने योजनासहित काम गरिरहेको बताए। उनका अनुसार, अहिले सेनाका १२ सय जना अधिकृत र जवान परियोजनामा खटिएका छन्।

‘हाम्रो लक्ष्य तोकेकै समयमा काम पुरा गरेर बुझाउने हो, सोही अनुसार काम भइरहेको छ’ उनले भने, ‘अहिलेसम्म हामी समय तालिका अनुसार अघि बढेका छौं।’

यसबीच, सेनाले परियोजनाका लागि सडकमा पर्ने २० हजार रुख कटान र १० वटा परियोजना क्याम्पमध्ये ८ वटा निर्माण गरिसकेको छ।

सम्बन्धित् समाचार