गृहपृष्ठ पत्रपत्रिका बाट रोकिएन सुन तस्करी

रोकिएन सुन तस्करी

प्रकाशित मिति:

काठमाडौं : साढे ३३ किलो सुन गायब प्रकरणमा गृहको छानबिन समितिले ७५ जनालाई प्रतिवादी बनाएर मुद्दा चलायो। केही पक्राउ पर्दै छुटे। केही फरार छन्। तर सुन तस्करी अझै सेलाएको छैन।

सोमबार साँझ काठमाडौं प्रहरीले टोखाबाट तीन किलो सुनसहित दुई जनालाई पक्राउ गरेको छ। केरुङ नाकाबाट काठमाडौंमा ल्याउँदै गरेको सुन बरामदसँगै पक्राउ परेका दुई व्यक्ति भरिया मात्रै हुन्। रसुवा गोसाइकुण्डका नरबहादुर घले र पेम्बा तामाङले पाइन्टमा पेटी घुसाउने ठाउँमा घुसाएर सुन ल्याएका थिए। सामान्यतः मोटरसाइकलमा सवार व्यक्तिले पेट्रोल ट्यांकी, एयर फिल्टर, साइलेन्सर र सिटमुनि सुन लुकाउँदै आएका थिए। घले र तामाङले भने नयाँ जुक्ति लगाएर सुन भित्र्रयाउन खोजेका थिए। प्रहरीले कम्मरतिर हात लगाउँदा भाग्न खोजेपछि उनीहरूको जुक्तिले काम गरेन।

एक किलो सुनको बिस्कुटलाई चार भागमा काटेर तीन किलो सुनका १२ टुक्रा बनाई लुकाएर ल्याइएको सुन घले र तामाङले केरुङको ग्रेटवाल होटलमा बस्दै आएका ‘भोट’ उपनामले चिनिने व्यक्तिले दिएको प्रहरीलाई बयान दिएका छन्। उनीहरूले एक किलो सुन काठमाडौं ल्याइदिएबापत तस्करले ५० हजार रुपैयाँ दिने गरेको रहस्य बयानमा खुलाएका छन्।

प्रहरीले सुन तस्करीमा प्रयोग भएको बा ७३ प ३४०२ नम्बरको मोटरसाइकल बरामद गरेको छ। रसुवामै घर बनाउने ठेक्काको काम गर्दै आएका घले र तामाङले योसहित काठमाडौंमा सुन भिœयाएको तेस्रो पटक हो। दुई पटक भने उनीहरू तीन किलो सुन ल्याउन सफल भएका थिए। उनीहरूले यसअघि पनि बालाजु माछापोखरीमा ल्याएर तिब्बतीलाई सुन बुझाएको प्रहरी बयानमा खुलाएका छन्।

एक किलो सुन काठमाडौं ल्याइदिएबापत तस्करले भरियालाई ५० हजार रुपैयाँ दिने गरेका छन्।

विशेष सूचनाका आधारमा सुन बरामद गर्न सफल भएको काठमाडौं प्रहरीका प्रमुख एसएसपी वसन्त लामाले बताए। यसअघि साढे ३३ किलो सुन गायब र सनम शाक्य हत्या प्रकरणमा गृह मन्त्रालयले बनाएको उच्चस्तरीय छानबिन समितिका सदस्यसमेत रहेका लामाले सुन तस्करी नियन्त्रण त्यति सजिलो नभएको स्विकारे। ‘अहिले त्रिभुवन अन्तर्राष्ट्रिय विमानस्थललाई प्रयोग गरेर संगठित रूपमा हुने सुन तस्करी रोकिएको छ।

अब केरुङ नाका सलबलाउन थालेको सूचना आएको छ’, उनले भने। काठमाडौं परिसरले केरुङबाट संगठीत रुपमा सुन तस्करी हुन थालेकाले तस्करको जालो तोड्न डीएसपीको कमान्डमा छुट्टै टोली परिचालन गरेको छ।

सुन बरामद घटनामा प्रारम्भिक रूपमा अभियुक्त पक्राउ पर्छन्। त्यसपछिका थप व्यक्ति कहिल्यै पक्राउ पर्दैैनन्। यसबारे लामा भन्छन्, ‘सुन सामात्नेबित्तिकै २४ घण्टाभित्र राजस्व अनुसन्धान विभागलाई सुन र पक्राउ परेका व्यक्ति बुझाउनुपर्छ। २४ घण्टामा प्रहरीले के अनुसन्धान गर्छ र थप व्यक्ति पक्राउ पर्छन् ? ’ राजस्वसँग बेलाबखत संयुक्त अपरेसन भए पनि सकभर विभाग प्रहरीलाई संयुक्त अपरेसनमा सहभागी नगराउने गरेको उनले बताए। ‘राजस्व प्रहरीसँग समन्वय गर्न चाहँदैन। यस्ता घटनामा तत्कालै कनेक्सन खुलाउन सकिएन भने मुख्य व्यक्ति पक्राउ गर्न सकिँदैन’, एसएसपी लामाले भने, ‘प्रहरीले सूचनाकै भर पर्नुपर्ने अवस्था छ।’

सुन प्रतिवेदन गोप्य

गृहका सहसचिव ईश्वरराज पौडेल नेतृत्वको उच्चस्तरीय छानबिन समितिले सरकारलाई बुझाएको प्रतिवेदन गोप्य राखेको छ। प्रधानमन्त्री कार्यालयमा बुझाइएको प्रतिवेदनले औंल्याएका र दिएका सुझावबारे समितिका सदस्य र प्रधानमन्त्री कार्यालयका समन्वय अधिकृतबाहेक अन्य वेखबर छन्।

समितिकै सिफारिसमा जिल्ला अदालत मोरङमा मुद्दा चलाइएका प्रहरी अधिकृत भटाभट छुटेका छन्। प्रमाणमुखी छानबिन नगरीकनै कल डिटेलमा आधारमा मात्रै मुद्दा चलाइएका एसएसपी दिवेश लोहनी, एसपी विकास खनाल, डीएसपी प्रजित केसी साधारण तारेखमा छुटेका छन्। प्रतिवेदन प्रधानमन्त्री कार्यालयमै थन्किएकाले त्यसका सुझाव र शंकाको घेरामा राखिएका व्यक्तिबारे थप छानबिन गर्ने प्रहरी बाटो रोकिएको छ।

सम्बन्धित् समाचार