भबिश्वर पाण्डे – कावासोती १६, असोज । नवलपुरको पहाडी क्षेत्र बुलिङ्टार गाउँपालिकाको शिव माध्यमिक विद्यालयका प्रधानाध्यापक ओम कुमार श्रेष्ठको रिहाइको माग गर्दै बुलिङटार क्षेत्रका सबै विद्यालयको पठन पाठन ठप्प पारिएको छ । विद्यालयमा ढिला आएको भन्दै कक्षा १० मा अध्ययनरत विद्यार्थी खुमान सार्की नेपालीलाई कानको जाली फुट्ने गरी कुट्ने प्रधानाध्यापक श्रेष्ठको रिहाइको माग गर्दै नेपाल शिक्षक सङ्घ बुलिङटारले आजदेखि विद्यालयको पठन पाठन ठप्प पारेको हो ।
नेपाल शिक्षक सङ्घले आज देखि १८ गते सम्म विद्यालयको पठन पाठन ठप्प पारेर आन्दोलनमा उत्रिएपछि विद्यालय जाने विद्यार्थीहरूको भविष्य अन्योलमा परेको छ । गत असोज २ गते कक्षा १० मा अध्ययनरत विद्यार्थी खुमानलाई ढिला आएको भन्दै विद्यालयका प्रधानाध्यापक श्रेष्ठले कानको जाली फुटाइदिएका थिए ।
पीडित खुमानका बुवा वीरबहादुर सार्कीले जिल्ला प्रहरी कार्यालय नवलपुरमा असोज ५ गते किटानी जाहेरी दिएपछि आरोपित प्रधानाध्यापक श्रेष्ठलाई प्रहरीले असोज ११ गते पक्राउ गरी म्याद थप गरेको छ । नवलपरासी प्रहरीले पीडितको उजुरीका आधारमा असोज ११ गते श्रेष्ठलाई पक्राउ गरी जिल्ला अदालतबाट म्याद थप गरेको हो ।
अदालतबाट ८ दिनको म्याद थप गराएर श्रेष्ठमाथि कुटपिट एवं अंगभंग गर्ने महलमा मुद्दा चलाइएको जिल्ला प्रहरी कार्यालय नवलपरासी मुद्दा शाखाका प्रहरी नायव निरीक्षक टीकाराम पोखरेलले जानकारी दिनुभयो ।
घाइते खुमानको भरतपुर अस्पतालमा उपचार भइरहेको छ । भरतपुर अस्पतालका नाक, कान घाँटी रोग विज्ञषेश डा. रमेश भण्डारीका अनुसार प्रधानाध्यापकको कुटाइबाट खुमानको कानको जालीमा क्षति पुगेको छ । उनको सुन्ने क्षमतामा समेत कमी आएको डा. भण्डारीको भनाइ छ ।
घरबाट झन्डै डेढ घण्टा हिँडेर विद्यालय पुग्ने गरेका खुमानसहितका १० विद्यार्थीलाई प्रधानाध्यापक श्रेष्ठले १५ मिनेट ढिला आएको भन्दै लाइन लगाएर कुटेका थिए ।
यसअघि नेपाल शिक्षक महासङ्घ नवलपुरले प्रद्यानध्यापक श्रेठलाई पक्राउ गरिएकोमा आपत्ति जनाउँदै प्रेस विज्ञप्तिमार्फत ध्यानाकर्षण भएको जनाएको थियो ।
