गृहपृष्ठ खबर किशोरीहरुलाई अपांगता अधिकार र लागू औषधबारे अभिमुखीकरण

किशोरीहरुलाई अपांगता अधिकार र लागू औषधबारे अभिमुखीकरण

प्रकाशित मिति:

किशोरीहरुलाई अपांगता अधिकार र लागू औषध नियन्त्रणबारे सचेतीकरण गरिएको छ । किशोरीहरुका माध्यमबाट अपांगता भएका व्यक्तिहरुको अधिकार सुनिश्चिताका लागि अभिमुखीकरण दिइएको हो । कपिलवस्तुको शिवराज नगरपालिका १, चैनपुरका श्रृजनशील किशोरी सम्बाद केन्द्रका किशोरीहरुलाई अपांगता भएका व्यक्तिहरुले पाउने सेवा सुविधा, नीति नियम कार्यान्वयनका बारेमा सचेतीकरण गरिएको थियो ।

कार्यक्रमको उद्घाटन सत्रलाई सम्बोधन गर्दै शिवराज नगरपालिका १ का वडाध्यक्ष जगतबहादुर घर्ती क्षेत्रीले हरेक निकाय अपांगमैत्री हुनुपर्नेमा जोड दिए । अपांगता भएका व्यक्तिहरुका लागि राज्यले कानुन बनाउँछ तर कार्यान्वयन नहुँदा अपांगता भएका व्यक्तिहरु अधिकारबाट बन्चित हुनुपरेको गुनासो गरे । वडाध्यक्ष घर्तीक्षेत्रीले स्थानीय निकायबाट हुने हरेक किसिमको सेवा सुविधा अपांगमैत्री बनाउन भरपूर कोशिस गर्ने प्रतिबद्धता जाहेर गरे ।

यसैगरी शिवराज नगर नगरकार्यपालिका सदस्य लक्ष्मी हमालले सबैले आ आफ्नो ठाउँबाट आवाज उठाएमा अपांगता भएका व्यक्तिहरुलाई सहयोग पुग्ने विश्वास व्यक्त गरेका थिए । कार्यक्रमको अवसरमा अपांगता पुनस्र्थापना केन्द्र शिवराजका अध्यक्ष दिपक खडकाले अपांगता भएका व्यक्तिले पाउने सेवा सुविधा, नीति, नियमबारे सहजीकरण गरेका थिए । दिगो तथा मर्या्दित, सामाजिक आर्थिक सशक्तिकरण कार्यक्रम अन्तर्गत किशोरीहरुमार्फत समाजमा जनचेतना फैलाउन सचेतनामूलक कार्यक्रम गरिएको खडकाले बताए । कार्यक्रममा वडा प्रहरी कार्यालय चन्द्रौटाका प्रहरी नायब निरीक्षक शेर बहादुर थापाले लागू औषधका बारेमा जानकारी दिंदै नियन्त्रणका किशोरीहरुले स्थानीय स्तरबाट आवाज उठाउनुपर्नेमा जोड दिए ।

किर्डाक नेपाल, स्ट्रोम फाउण्डेसनको आयोजना तथा शिवराज नगरपालिका र वडा प्रहरी कार्यालय चन्द्रौटाको सहयोग रहेको कार्यक्रम रामकिस्नी थारुको अध्यक्षता र इन्दू थारुको संचालनमा सम्पन्न भएको थियो ।

सम्बन्धित् समाचार