सप्तरीको महादेवा गाउँपालिका १ पकरीका २३ वर्षीय नइम पमरिया र उनकी आमा ५० वर्षीया जमुनी खातुन मंगलबार पक्राउ परेका छन् ।
ज्येष्ठ नागरिक ६२ वर्षीय मो. गफुर पमरियाको हत्या आरोपमा उनका श्रीमति जमुनी र छोरा नइमलाई पक्राउ गरिएको प्रहरी नायव उपरीक्षक तिलक भारतीले जानकारी दिए ।
दिनहुँ मदिरा सेवन गरेर घर आउने नइमले मदिराको सुरमा आइतबार राति कुटपिट गर्दा गफुरको मृत्यु भएपछि नइम र जमुनी दुबै फरार थिए ।
कुटपिटबाट गम्भीर घाइते भएका गफुरलाई राजविराजस्थित अस्पताल ल्याउँदै गर्दा बाटोमै मृत्यु भएको थियो ।
मृतकका भाई मो. इसराइल पमरियाले सोमबार जिल्ला प्रहरी कार्यालयमा घटनाबारे उजुरी दिएका थिए । हत्या आरोपितहरुलाई पक्राउ गरी थप अनुसन्धान कार्य सुरु गरिएको र कर्तव्य ज्यान अन्तर्गत कारवाही प्रकृया अगाडि बढने प्रहरी नायव उपरीक्षक भारतीले बताए ।
