कपिलवस्तुको वाणगंगा नगरपालिका चार नम्बर जीतपुर चोकमा शनिवार सरकारको समर्थनसंगै विरोध प्रदर्शन गर्ने क्रममा वाणगंगा नगरपालिकाको खर्च विवरण सार्वजनिक गर्न माग गरिएको छ । कोरोना महामारीको समयमा वाणगंगा नगरपालिकाद्धारा दैवी प्रकोप कोष स्थापना गरिएको छ । कोषमा विभिन्न संघसस्था तथा व्यक्तिले सहयोग गरेका छन् ।
कोषमा हालसम्म जम्मा रकम के कति कहाँ कहाँ खर्च भयो भन्ने विवरण आम नगरवासीले जान्न चाहेको भन्दै खर्च विवरण सार्वजनिक गर्न माग गरिएको हो । प्रदर्शनमा युवाहरुले वाणगंगा नगरपालिकाले क्वारेन्टाईन व्यवस्थापन गर्न नसकेको र आईसोलेसन निर्माणमा ढिलाई भएको प्रति असन्तुष्ट जनाएका थिए । कोरोना संक्रमितलाई व्यवस्थित आईसोलेनमा नभएर बाख्रा बस्ने खोर जस्तै गरि राखिएकोमा युवाहरुले आक्रोस व्यक्त गरेका थिए ।
प्रदर्शनमा युवाहरुले सरकारले हालै सार्वजनिक गरेको नयाँ नक्साको स्वागत गर्दै एक अर्कोमा खुशी व्यक्त समेत गरेका थिए । सरकारले कोरोना नियन्त्रणमा ध्यान नदिएको, भ्रष्टाचार मौलाएको लगायतका आरोप लगाउँदै केही दिनयता युवाहरुले देशव्यापी आन्दोलन गर्दै आएका छन् ।
