बुटवल,फागुन ६-
स्कुल बसको ठक्करबाट रुपन्देहीको तिलोत्तमामा एकजनाको मृत्यु भएको छ ।
तिलोत्तमा-११ कुमारीचोकमा शान्ती नमुना माध्यमिक विद्यालयको लु १ क ८२४ नम्बरको बसको ठक्करबाट मर्निङवाकमा निस्किएका तिलोत्तमा नगरपालिका-११ बस्ने ३४ वर्षीय सुमन खौसियाको मृत्यु भएको हो ।
बिहान साढे ५ बजे मर्निङवाक निस्केका मृतक खौसिया र स्थानीय आरती थापालाई ठक्कर दिएको थियो । घाइते थापाको क्रिमसन अस्पताल मणिग्राममा उपचार भइरहेको प्रहरीले जनाएको छ ।
विपरीत दिशाबाट गएको ट्रकले झुक्याएका कारण बसदुर्घटनामा परेको हुन सक्ने प्रारम्भिक अनुमान प्रहरीले गरेको छ । बससहित चालकलाई प्रहरीले नियन्त्रणमा लिएर अनुसन्धान गरिरहेको छ ।
