तुलसीपुरको दूधेनामा सोमवार जीपले अटोलाई ठक्कर दिँदा एक जनाको मृत्यु भएको छ । थप पाँच जना घाइते भएका छन् । दुर्घटनाका गम्भीर घाइते दाङको शान्तिनगर गाउँपालिका–१ पेदीखोला निवासी ३० वर्षीय अटो चालक रमेश विकको उपचारका क्रममा कोहलपुर मेडिकल कलेजमा मृत्यु भएको छ ।
गम्भीर घाइते विकलाई राप्ती प्रादेशिक अस्पताल तुलसीपुरको प्रारम्भिक उपचारपछि थप उपचारका लागि बाँकेको कोहलपुर रेफर गरिएको थियो । उनको उपचारका क्रममा बेलुकी सात बजे तिर मृत्यु भएको इलाका प्रहरी कार्यालय तुलसीपुरले जानकारी दिएको छ ।
त्यस्तै अटोमै सवार अन्य २ जना घाइतेको अवस्था सामान्य रहेको र उनीहरुको उपचार राप्ती प्रादेशिक अस्पताल तुलसीपुरमा भइरहेको प्रहरीले बताइएको छ । दिउँसो तीन बजेतिर तुलसीपुरबाट पश्चिमतर्फ जाँदै गरेको रा १ ह ४३३६ नम्बरको अटो र पश्चिमबाट तुलसीपुरतर्फ आउँदै गरेको रा १ ज ५०८ नम्बरको जीप तुलसीपुर उपमहानगरपालिका ८ दूघेनामा एक आपसमा ठोक्किँदा उक्त दुर्घटना भएको हो ।
जीप चालक प्रहरी नियन्त्रणमा छन् । प्रहरीले तीव्र गतिका कारण दुर्घटना भएको अनुमान गरेको छ ।
