गृहपृष्ठ Featured रुसी पक्षको ठूलो संख्यामा मानवीय क्षति भएको दाबी !

रुसी पक्षको ठूलो संख्यामा मानवीय क्षति भएको दाबी !

प्रकाशित मिति:

बेलायतका गुप्तचर अधिकारीहरूका अनुसार युक्रेनको दोनेत्स्क क्षेत्रको युद्धमा ठूलो संख्यामा रुसी र रुसी ‘प्रोक्सी’ फौज हताहत भएका छन् । उनीहरूको अनुमान अनुसार दोनेत्स्क छापामारले मात्रै आफ्ना ५५ प्रतिशत सक्कली फौज गुमाएको छ ।

युक्रेनी नेताहरूका अनुसार रुसी फौज लिसिचान्स्क सहरलाई घेराबन्दी गर्ने उद्देश्यले लुहान्स्कको सम्पूर्ण भूभाग कब्जा गर्ने दिशामा केन्द्रित छ । क्षेत्रीय प्रमुख सर्हिय हाइदाइले यस सहरमा भयानक विनाश भएको बताएका छन् । उनका अनुसार सेभेरोदोनेत्स्क सहरको स्थिति अझै खराब रहेको र त्यहाँ करिब सातदेखि आठ हजार सर्वसाधारण अलपत्र अवस्थामा छन् ।

बेलायती सैनिक गुप्तचर निकायले दोनेत्स्क र लुहान्स्क मिलेर बनेको युक्रेनको पूर्वी दोन्बास क्षेत्रमा रुसले ठूलो संख्यामा जगेडा फौज तैनाथ गर्ने संभावना धेरै रहेको बताएको छ ।

स्वघोषित दोनेत्स्क जनगणतन्त्रको मानव अधिकारवादी संस्था ओम्वुड्सम्यानले रुसी पक्षको २ हजार १ सय २८ फौज मारिएको, ८ हजार ८ सय ९७ जना घाइते भएको र थप ६ सय ५४ जना सर्वसाधारणको पनि ज्यान गएको जनाएको छ ।

मंगलबार युक्रेनको राष्ट्रपति भोलोदिमिर जेलेन्स्कीले लुहान्स्कको स्थिति निकै त्रासदीपूर्ण रहेको, रुसी फौजले दोनेत्स्कमा पनि दबाब बढाइरहेको बताएका थिए । यसैगरी बुधवार रुसी फौजले दक्षिणी सहर माइकोलाइभमा सातवटा क्षेप्यास्त्र प्रहार गरेको छ ।

-बीबीसीबाट ।

सम्बन्धित् समाचार