शुक्रबार राति १२ बजेतिर सुनसरीको बर्जु गाउँपालिकामा खटिएका सादा पोशाकका प्रहरीको हतियार लुट्ने ७ जनाको गिरोहलाई प्रहरीले पक्राउ गरेको छ।
बर्जु–१ शुक्रबारेमा सादा पोशाकका प्रहरीलाई आक्रमण गरी हतियार र गोली लुट्ने गिरोहका नाइकेसहित ७ जना पक्राउ परेकामध्ये एक जना बालक छन्। बालकसहित ७ जनालाई मोरङ प्रहरीले पक्राउ गरेको हो।
राति डिउटीमै रहेका प्रहरीमाथि आक्रमण गरी पक्राउ परेका समूहले हतियार र गोली लुटेका थिए। मोरङ प्रहरीले आइतबार पत्रकार सम्मेलन गर्दै पक्राउ परेकाहरुलाई सार्वजनिक गरेको हो।
लुटपाट गर्ने समूहका नाइके मोरङको बुढीगंगा गाउँपालिका–४ का ४० वर्षीय रिजवान मियाँ, २५ वर्षीय सिजाम आलम (सिजाम मोबाइल सेन्टर सञ्चालक), बुढीगंगा–५ का २१ वर्षीय मो.नजरूल मियाँ छन्। त्यस्तै, सुनसरी दुहबी नगरपालिका–४ का ३२ वर्षीय नसुदिन मियाँ, दुहबी–१ का ३० वर्षीय मो.अलिम मुर्तुजा, भारत घर भई हाल दुहबी–६ का ४० वर्षीय मो.आलमका साथै एक जना बालक पक्राउ परेका छन्।
मोरङ र सुनसरीमा शृङ्खलाबद्ध लुटपाट र प्रहरीको हतियार लुट्ने समूह शुक्रबार राति पौन १२ बजेतिर पक्राउ परेका हुन्। बुढीगंगा–५ कोयलपुरको नहरमा शंकास्पद रुपमा हिँड्दै गर्दा उनीहरुलाई पक्राउ गरिएको मोरङ प्रहरीका प्रवक्ता डिएसपी रञ्जनकुमार दाहालले जानकारी दिए।
पक्राउ परेका लुटेरा समूहले मोरङ र सुनसरीमा पछिल्ला समय शृङ्खलाबद्ध रुपमा लुटपाट गर्दै आएको खुलेको छ। उनीहरुले राति ११ बजेपछि बिहान ४ सम्म घटना घटाउने, एकान्त स्थानमा बाटो ढुकेर सवारीसाधन रोक्ने, पेस्तोल, रड, लाठीलगायतका हतियार देखाएर नगद, गरगहना, मोबाइलहरु लुट्ने गरेको पाइएको छ। उनीहरुले दुई जिल्लामा स्थान परिवर्तन गरी लुटपाट गर्नुका साथै पीडितहरुलाई कुटपिटसमेत गर्ने गरेको डिएसपी दाहालले बताए।
