बाँकेको डुडुवा गाउँपालिका वडा नम्बर ६ असमानपुरस्थित ‘जयेन्दु बाल सुधार गृह’ बाट फरार भएका मध्ये ९ जना बाल कैदी बन्दी अझै सम्पर्कमा आएका छैनन्।बाल सुधार गृहभित्र दुई पक्षबिच बिहीबार राती झडप हुँदा रुपन्देहीका १८ वर्षीय सुलभ केसीको मृत्यु भएको थियो, भने १० जना घाइते भएका थिए।मृतक केसीमाथि अपहरण, शरीर बन्धक तथा जबरजस्ती करणीको कसुर थियो।
बाल सुधार गृहमा भएको तनाव साम्य भए पनि फरार रहेका ९ जना शुक्रवार अपराह्नसम्म पनि सम्पर्कमा नआएको जिल्ला प्रहरी कार्यालय बाँकेका प्रवक्ता एवम् प्रहरी नायव उपरीक्षक(डिएसपी) नारायण डाँगीले जानकारी दिए।उनका अनुसार बिहीबार राती १० बजे कैदी बन्दी बिच झडप सुरु भएको थियो ।
त्यसपछि सुधार गृहमा रहेका २ सय ५४ जना कैदी बन्दी बाहिर निस्केका थिए। तीमध्ये २ सय ४५ जनालाई प्रहरीले नियन्त्रणमा लिएको थियो।सम्पर्कमा नआएका ९ जनाको खोजी गर्न प्रहरी टोली विभिन्न ठाउँमा परिचालन भएको जिप्रका बाँकेले जनाएको छ।