इजरायली हवाई आक्रमणमा गाजामा कम्तीमा ३२ जना प्यालेस्टिनीको ज्यान गएको छ । स्थानीय अधिकारीहरूका अनुसार गाजा पट्टीमा इजरायली हवाई आक्रमणमा कम्तीमा ३२ जनाको ज्यान गएको बीबीसीले जनाएको छ ।
हमासद्वारा सञ्चालित नागरिक रक्षा एजेन्सीले मारिनेहरूमा बालबालिका र महिलाहरू रहेको बताएको छ । दक्षिणी शहर खान युनिसमा विस्थापित मानिसहरूलाई आश्रय दिइरहेको पालमा हवाई प्रहार भएको हो ।
प्यालेस्टिनीहरूले यी हमलाहरूलाई चार महिनाअघि राष्ट्रपति ट्रम्पको मध्यस्थतामा भएको दोस्रो चरणको युद्धविरामपछिको सबैभन्दा ठूलो हमलाको रूपमा वर्णन गरेका छन् ।
इजरायली सेनाले शुक्रवार हमासले सम्झौताको उल्लङ्घन गरेको भन्दै प्रतिक्रियास्वरूप धेरै आक्रमणहरू गरिएको पुष्टि गरेको छ ।
गएको वर्षदेखि लागू भएको युद्धविराम सम्झौता उल्लङ्घन गरेको आरोप इजरायल र हमास दुवैले एकअर्कामाथि लगाउँदै आएका छन् ।
