आईसीसी विश्वकप लिग–२ त्रिकोणात्मक सिरिजमा नेपाली राष्ट्रिय क्रिकेट टोलीले लगातार दोस्रो हार व्यहोरेको छ।
बिहीबार राति सकिएको खेलमा नेपाल नेदरल्यान्ड्सँग ६ विकेटले पराजित भएको हो।
लिग चरणको तेस्रो खेलमा नेपालले सोमबार पुनः नामिबियासँग खेल्नेछ। बुधबार पुनः नेदरल्यान्डसँग खेल्नेछ।
सिरिजको पहिलो खेलमा नेपाल नामिबियासँग ८ विकेटले पराजित भएको थियो। लगातार दोस्रो हारसँगै नेपालको शीर्ष चारमा रहेर सोझै विश्वकप खेल्ने योजनामा धक्का पुगेको छ।
नेपालले दिएको १ सय ५८ रनको लक्ष्य नेदरल्यान्ड्सले ४४.१ ओभरमा ४ विकेटको क्षतिमा भेट्टायो।
नेदरल्यान्ड्सका लागि कप्तान स्कट एडवर्ड्सले सर्वाधिक ६१ रनको योगदान दिए। एडवर्ड्सले ८९ बलमा २ चौका र १ छक्का हाने। नोआ क्रोसले ३४ रन थपे।
ओपनर सेड्रिक डी ल्यान्ज र ज्याक लायन–क्यासेटले समान २१ रन थपे।
नेपालका लागि सोमपाल कामी, दिपेन्द्रसिंह ऐरि र ललित राजवंशीले समान एक विकेट लिए।
त्यसअघि नेदरल्यान्ड्सको उट्रेक्टस्थित स्पोर्टपार्क मार्सचाल्करवेर्डमा घरेलु टोलीले टस जितेर फिल्डिङ रोजेपछि ब्याटिङ गरेको नेपाली टोली ४४.४ ओभरमा १ सय ५७ रन बनाउँदा अलआउट भयो।
नेपालका लागि आरिफ शेखले बनाएको ४१ रन नै सर्वाधिक रह्यो। उनले ९० बलमा ४ चौका प्रहार गरे।
गुल्सन झाले २९, दिपेन्द्रसिंह ऐरिले २१ र आशिफ शेखले १४ रन थपे। करण केसी १३ रनमा नटआउट रहे। सोमपाल कामी १० रन बनाउँदा एलबीडब्लु धरापमा परे।
नेपाललाई कम स्कोरमा रोक्न एलेक्स रोय र रोलोफ भान डेर मर्वेले समान ३ विकेट लिए। लोगान भान विकले २ तथा काइल केलिनले १ विकेट लिए।
