कपिलवस्तु ।
दोस्रो बुद्धभूमि कृषि, उद्योग, तथा पर्यटन महोत्सवको पहिलो दिनमा दर्शकको उत्साहजनक उपस्थिति देखिएको छ ।
स्थानीय उत्पादनको प्रचार, प्रसार र प्रवद्धनमा टेवा दिने उदेश्यले होटल तथा रेष्टुरेन्ट ब्यवसायी संघ कपिलवस्तुले विहिबारबाट सुरु गरेको महोत्सवमा ठाउँठाउँबाट दर्शकको सहभागिता रहेको थियो । महासचिव पदम ढकालले पहिलो दिनको जनसहभागिताले आफूहरुको हौसला बढेको बताए ।
स्थानीय उत्पादन र ब्यापारको प्रवद्धनको लागि सुरु भएको महोत्सवको नेपाल सरकारका महिला बालबालिका तथा समाज कल्याण मन्त्री सुरेन्द्रराज आचार्यले उद्घाटन गरेका थिए ।
उद्घाटन सत्रलाई सम्बोधन गर्दै मन्त्री आचार्यले स्थानीय कला संस्कृति र पर्यटनको संरक्षण संवद्धन गर्न महोत्सव सफल हुने विश्वास ब्यक्त गरे ।
पहिलो दिनको सहभागिताबाट आफू पनि खुसी भएको बताउँदै आफूले पनि सहयोग गर्ने बताए । यस्तै बुद्धभूमि नगरपालिकाका नगरप्रमुख तथा विशिष्ट अतिथि केशव कुमार श्रेष्ठले पनि स्थानीय कला, संस्कृति र ब्यापार प्रवद्धनमा महोत्सव महत्वपूर्ण भएको बताएका थिए ।
महोत्सव संयोजक तथा संघका अध्यक्ष लेखनाथ घर्तीले पहिलो दिनमा दर्शकले दिएको माया बिर्सन नसक्ने बताए ।
महोत्सवको अध्यक्षता गरेका उनले अन्तिमसममै सबैको सहयोग हुने विश्वास ब्यक्त गरे । महोत्सव मङ्सिर १४ देखि २४ गते सम्म संचालन हुदै छ।
