वैखरी अनलाईन, बाणगंगा ।
चर्चित नेपाली फुटबल खेलाडी विमल घर्तीमगर कपिलवस्तु तिलौराकोट गोल्ड कपमा खेल्दै छन् । आज उनी मछिन्द्र एफसीबाट खेल्न लागेका हुन् ।
गोल्डकपको दोस्रो दिन मछिन्द्र एफसी र हनामी बीएफसी चितवन भिड्दै छन् । मछिन्द्र र हनामी सेमिफाईनलमा आफ्नो स्थान सुरक्षित गर्न आज आईतबार भिड्न लागेका हुन् ।
खेल कपिलवस्तुको बाणगंगा नगरपालिकाको चारनम्बर जीतपुरमा अवस्थित बुद्धरंगशालामा दिउँसो ४ बजेदेखि खेल सुरु हुने गोल्डकपको आयोजक संस्था जिल्ला फुटबल संघ कपिलवस्तुका अध्यक्ष तिलक थापाले जानकारी दिए ।
थ्री स्टार क्लव शनिबार नै कपिलवस्तु- ११ लाई हराउँदै सेमिफाईनलमा प्रवेश गरिसकेको छ । थ्री स्टारले ३–० गोल अन्तरले कपिलवस्तुलाई पराजित गरेको थियो ।
गोल्डकपको उपाधि जित्ने टोलीले ११ लाख ११ हजार १११ र दोस्रो हुनेले ५ लाख ५५ हजार ५५५ रुपैयाँसहित शिल्ड, मेडल र प्रमाणपत्र प्राप्त गर्ने छन् ।
