नयाँ सरकार संविधानको धारा ७६(२) कि ७६(३) अनुसार भन्ने बहस भइरहेका बेला राष्ट्रपति रामचन्द्र पौडेलले शुक्रबार कानुनविद्हरूसँग परामर्श गरेका छन् । शीतलनिवासमा संवैधानिक कानुनका ज्ञाताहरूसँग राष्ट्रपतिले परामर्श गरेको राष्ट्रपतिको सचिवालयले जनाएको छ ।
परामर्शमा पूर्णमान शाक्य, विपिन अधिकारी, गोपालकृष्ण घिमिरे, हरिहर दाहाल, शेरबहादुर केसी, टीकाराम भट्टराई, चन्द्रकान्त ज्ञवाली, सिताराम केसीको सहभागिता रहेको राष्ट्रपतिको सचिवालयले जनाएको छ ।
परमर्शमा सहभागी कानुनविद् नेपाल बारका अध्यक्ष गोपालकृष्ण घिमिरेले संविधानको धारा ७६(२) अनुसार नै नयाँ सरकार गठनका लागि कानुनसिवद्हरूले सुझाव दिएको बताए । उनले दुई ठूला पार्टीहरूले यही धाराअनुसार नयाँ सरकार बनाउने सहमति गरिसकेको अवस्थामा उपधारा ३ मा जान नहुने सुझाव आएको बताए ।
परामर्शमा सहभागी चन्द्रकान्त ज्ञवालीले भने उपधारा ३ अनुसार जानुपर्ने बताएका थिए । उनले यसअघि सार्वजनिक रूपमा पनि उपधारा ३ अनुसार नयाँ सरकार गठन हुनुपर्ने बताउँदै आएका थिए ।
