‘उज्यालो तिलोत्तमा’ कार्यक्रममा आर्थिक अनियमितता भएको खुलासा

वडामा सडक बत्ती जडान गर्ने क्रममा वडाअध्यक्षले मनोमानी रुपमा निश्चित व्यक्तिलाई जिम्मा दिनुका साथै योजना फर्स्यौट गर्न गुपचुपमै समिति गठन गरिएको उपभोक्ताहरुको आरोप छ ।

योजना फर्स्यौट गर्नका लागि पेस गरिएको बिल भरपाईमा विद्युत सामग्रीहरुको मुल्य अस्वभाविक राखिएको पाइएपछि उपभोक्ताहरुले बिरोध गरेका थिए । उक्त विरोधपछि पहिले पेश गरिएको दर रेट परिवर्तन गरी भुक्तानीका लागि पुनः अर्को बिल भरपाई पेस गरिएको थियो ।

सडकमा जडान गर्न खरिद गरिएको ५० वाटको स्ट्रीट लाइटको मुल्य ३७९५ रुपैयाँ राखेर तयार पारिएको बिलमा उपभोक्ताले छानबिन गर्न थालेपछि परिमार्जन गरी २१०० रुपैया बनाइएको थियो । पूर्व वडा अध्यक्ष चेतनारायण भण्डारीका अनुसार २० वाट बल्बको मुल्य ५७५ राखिएकोमा उपभोक्ताको बिरोधपछि ४६५ कायम गरिएको थियो भने १८ वाटको बल्बको मुल्य ४३५ राखिएकोमा उपभोक्ताले छानबिन गरेपछि ३४० मा झारिएको थियो ।

उपभोक्ता समितिले बजार भाउभन्दा दोब्बर मुल्य राखी रकम भुक्तानीका लागि नगरपालिकामा बिल/भरपई पेश गरेको वडा अध्यक्ष रमेश डुम्रेले समेत स्वीकार गरे । मुल्य बढाएर राखिएको बिल भरपाई फिर्ता गरी पुनः अर्को मुल्य कायम गरी फर्स्यौटका लागि पेस गरिएको उनले बताए । यो विषय प्राविधिक विषय भएको बताउँदै उनले घटनामा आफ्नो भने कुनै संलग्नता नभएको दाबी गरे ।

यद्यपी वडा अध्यक्ष डुम्रेकै योजनामा प्रभात टोल बिकास संस्थाका अध्यक्ष यज्ञ भट्टराईलाई उपभोक्ता समितिको संयोजक बनाइएको पूर्व वडा अध्यक्ष चेतनारायण भण्डारीले बताए । भट्टराईको नेतृत्वमा ८/९ महिना पहिले नै सडक बत्ती जडान गरिए पनि नगरपालिकामा फर्स्यौट गर्ने बेला कागजी प्रक्रिया मिलाउन समिति गठन गरिएको उनको आरोप छ ।

वडा अध्यक्ष रमेश डुम्रेका अनुसार २०८१ वैशाख २८ गते समिति गठन गरिएको हो । जबकी उक्त समितिका संयोजक भट्टराईले २०८० को दशै तिहारमै लाइट जडान गरिएको भनेर प्रतिक्रिया दिएको स्थानीय उपभोक्ता तथा रास्वपा नगरसभापति रुषतम कंडेलले बताए । वडा जनप्रतिनिधिहरुले समेत त्यसअघि (समिति गठन हुनुअघि) नै सडब बत्ती जडान गरिको भन्दै सामाजिक सञ्जालहरुमा फोटो/भिडियो सार्वजनिक गरेका थिए ।

अघिल्लो बिल :

पछिल्लो बिल

दोषीलाई पत्ता नलगाई ढाकछोप गरिएको भन्दै विहिबार उपभोक्ताहरुले वडा कार्यालय घेराउ गरेपछि घटना थप छताछुल्ल भएको हो ।