बागमती प्रदेशसभामा प्रधानमन्त्री केपी शर्मा ओलीको ‘हत्या’ गर्ने आसयको अभिव्यक्ति दिने नेपाली कांग्रेसका प्रदेशसभा सदस्य नरोत्तम वैद्यलाई पक्राउ गर्न एमालेले माग गरेको छ ।
एमालेको बागमती प्रदेश संगठन कमिटीले प्रदेशसभाको रोष्टमबाट गोड्से बन्छु भन्ने अभिव्यक्ति दिने सांसद वैद्यलाई पक्राउ गरी ज्यान मार्ने उद्योग गरेको अभियोगमा मुद्दा चलाउन माग गरेको हो ।
काठमाडौंबाट निर्वाचित नेपाली कांग्रेस सांसद वैद्यले शुक्रबार प्रदेशसभा बैठकमा आफू नाथुराम गोड्से बन्न तयार भएको अभिव्यक्ति दिएका थिए ।
एमाले प्रदेश कमिटीले प्रधानमन्त्री ओलीविरुद्ध राजनीतिक र वैचारिक रुपमा मात्र नभइ भौतिक आक्रमण हुन सक्ने सूचना आइरहेको र वैद्यको अभिव्यक्तिले त्यसको पर्दाफास भएको जनाएको छ । एमाले बागमती प्रदेश अध्यक्ष आनन्दप्रसाद पोख्रेलद्वारा जारी विज्ञप्तिमा वैद्यलाई प्रदेशसभाबाट निलम्बन गरी तत्काल पक्राउ गरेर ज्यान मार्ने उद्योगअन्तर्गत मुद्दा चलाउन माग गरिएको छ । ओलीको हत्या गर्ने योजनामा संलग्न रहेका सबै दोषी पत्ता लगाउन शक्तिशाली आयोग गठन गर्नुपर्ने माग पनि एमालेले गरेको छ ।
बागमती प्रदेश सरकारले आगामी आर्थिक वर्ष २०७८/०७९ का ल्याएको नीति तथा कार्यक्रममाथि भएको छलफलमा वैद्यले आफू गोड्से बन्न तयार रहेको अभिव्यक्ति दिएका थिए ।
‘खड्गप्रसाद ओलीलाई नरोक्ने हो भने उनले यो देश खाइदिन्छन् । अब नाथुराम गोड्से बन्न तयार हुनुपर्यो, कोही बन्न तयार छैन भने म बन्छु,’ वैद्यले शुक्रबार प्रदेशसभामा भनेका थिए । नाथुराम गोड्सेले भारतका राष्ट्रपिता मानिने माहात्मा गान्धीको हत्या गरेका थिए ।
आत्मालोचना गर्न कांग्रेसको निर्देशन
प्रदेशसभामा अमार्यदित टिप्पणी गरेको भन्दै नेपाली कांग्रेसले आत्मालोचना गर्न वैद्यलाई निर्देशन दिएको छ । बागमती प्रदेशस्थित कांग्रेस संसदीय दलका नेता इन्द्र बानियाँले वैद्यलाई आत्मालोचना गर्न निर्देशन दिएका हुन् ।
