दक्षिणपश्चिम चीनको सिचुआन प्रान्तमा सोमबार गएको ६.८ म्याग्निच्युडको भूकम्पमा परी हालसम्म ६५ जनाको मृत्यु भएको त्यहाँका स्थानीय अधिकारीहरूलाई उद्धृत गर्दै चीनको राष्ट्रिय समाचार एजेन्सी सिन्ह्वाले जनाएको छ ।
तिब्बती स्वायत्त प्रिफेक्चर गान्जीमा ३७ जनाको मृत्यु भएको थियो भने याआन सहरको शिमियान काउन्टीमा २८ जनाको मृत्यु भएको थियो ।
मंगलबार बिहान ७ बजेसम्म गान्जीमा १२ जना बेपत्ता र १७० जना घाइते भएका छन् भने ५६ जना गम्भीर घाइते रहेका छन् । आज बिहान शिमियान काउन्टीमा ७८ जना घाइते भएका छन् ।
चाइना अर्थक्वेक नेटवर्क सेन्टरका अनुसार सिचुआन प्रान्तमा बेइजिङको समयअनुसार दिउँसो १२ बजेर ५२ मिनेटमा भूकम्प गएको थियो । सिचुआन प्रशासनले भूकम्पको लागि उच्च स्तरको आपतकालीन उद्धार टिमलाई सक्रिय बनाएको छ ।
