दाङ, असोज १ ।
बाँकेमा ठूलो परिमाणमा लागुऔषध ब्राउनसुगरसहित तीन जना पक्राउ परेका छन्। पक्राउ पर्नेमा श्रीमान-श्रीमतीसहित तीन जना छन्।
कोहलपुर नगरपालिका वडा नं। १२ चप्परडौडीकी ३८ वर्षीया यशोदा कार्की, उनका श्रीमान रुद्रबहादुर कार्की र सोही ठाउँ बस्ने २४ वर्षीय मनोज गिरी पक्राउ परेका हुन्।
जिल्ला प्रहरी प्रवक्ता डिएसपी रामप्रसाद घर्तीकाअनुसार यशोदा कार्कीको चप्परडौडीस्थित घरबाट शनिबार बिहान उनीहरूलाई पक्राउ गरेको हो।
उनीहरूबाट २६ ग्राम ४ सय मिलिग्राम ब्राउन सुगर, पाँच लाख ७३ हजार हजार ८ सय १० रुपैयाँ, डिजिटल तराजु बरामद भएको डिएसपी घर्तीले बताए।
घर्तीका अनुसार रुद्रबहादुर कार्की पेशाले चालक थिए। उनले ब्राउनसुगरको प्रयोग तथा कारोबार गर्दै आएका थिए।
‘पति-पत्नि प्रयोगकर्ता र ब्राउनसुगरको अबैध कारोबारी भएको खुलेको छ,’ डिएसपी घर्तीले भने।
ब्राउनसुगरको अवैध कारोबार भइरहेको सूचनाका आधारमा सुरूमा गिरीलाई पछ्याउँदै प्रहरी कार्कीको घर पुगेको थियो।
