बिटा थाईलेसिया नामक रोगबाट प्रभावित भएकी कपिलवस्तुकी एक बालिकाका लागी तौलिहवाका युवाहरुले संकलन गरेको सहयोग रकम परिवारलाई हस्तान्तरण गरिएको छ । जिल्लाको बुद्धभुमी नगरपालिका वडा नम्बर ३ कि ६ बर्षिय गृष्मा खनाललाई जन्मिएको दुई महिना देखी सो रोग देखिएको हो । तौलिहवा स्थित बाल सेना ग्रुपले सामाजिक सञ्जाल र बिभिन्न बिद्यालयका बिद्यार्थीले दिउको खाजा खर्च कटाएको सहयोग रकम बापतको १ लाख ६१ हजार रुपैया बालिकाका बाबु श्रीधर खनाललाई हस्तान्तरण गरेको हो । बाल सेना ग्रुपका अध्यक्ष शिवशंकर तमोली, कपिलवस्तु नगरपालिकाका वडा नम्बर १ का अध्यक्ष सुदिप पौडेल, तौलेश्वरनाथ महादेव मन्दिर व्यवस्थापन समितीका अध्यक्ष राम कुमार गुप्ता र समुहका सदस्य भानु चर्तुबेदी लगायतले खनाललाई सो रकम हस्तान्तरण गरेका थिए । सहयोग रकम बुझदै गृष्माका बाबु श्रीधरले छोरीलाई जन्मिएको दुई महिना पछि नै सो रोगको संक्रमण देखिएको जनाउदै पहिले मासिक १ पोका रगत दिनु पर्नेमा अब भने प्रत्यक २० दिनमा एक पोका रगत दिनु परेको बताए ।
छोरीको उपचार भारतको बेग्लोरमा भै रहेको जनाउदै बोन म्यारोको ट्रान्सप्लान्ट गरि हुने उपचारका लागी भारतीय २२ देखी २५ लाख खर्च लाग्ने अस्पतालले जानकारी दिएको खनालले बताए । आफनो न्युन आर्थिक अवस्थाका कारण छोरीको उपचार हुन नसकेको बताउदै उपचारका लागी सहयोगी हातहरुको सहयोगका लागी उनले अनुरोध गरे । हाल सम्म करिब ५ लाख रुपैया सहयोग संकलन भएको जनाउदै युवाहरुको सहयोगले छोरीको उपचारमा केहि हद सम्म सहयोग मिल्ने उनको भनाई थियो । बालिकाको उपचारका लागी तत्कालै ५ हजार रुपैया सहयोग गरेका वडा अध्यक्ष पौडेलले आफुले आवश्यक सहयोगका लागी बिभिन्न निकायमा पहल गर्ने प्रतिबद्धता जनाए । बालिकाको उपचारका लागी सामाजिक सञ्जाल मार्फत सहयोग जुटाउने कार्य सगै बिभिन्न बिद्यालयमा पुगी बिद्याथीले खाजा खर्चबाट कटाएर दिएको सहयोगको रकम हस्तान्तरण गरिएको बाल सेना ग्रुपका अध्यक्ष शिवशंकर तमोलीले बताए । “हामीले गृष्मा बचाउ अभियान अन्र्तगत सहयोग रकम जुटाएका छौ । अभियानलाई निरन्तरता दिने छौ । ” तमोलीले भने ।
