कपिलवस्तुको वाणगंगा नगरपालिकाले नगरभित्र गरिबीको सूचीमा सूचीकृत घरपरिवारलाई गरिब परिचयपत्र वितरण कार्य तीव्र रूपमा अगाडि बढाएको छ । नगरपालिका भित्र ११ सय ८६ घरपरिवार गरिबीको सूचीमा सूचीकृत रहेका छन् । जसमध्ये ४६६ जना अति गरिब, ३५९ जना मध्यम र ३६१ जना सामान्य गरिबको सूचीमा सूचीकृत रहेका छन् । सबै भन्दा धेरै वडा नं. १० मा २ सय ६ घरपरिवार गरिबीको सूचीमा सूचीकृत छन् । त्यस्तै सबै भन्दा कम वडा नं. १ मा २३ घरपरिवार गरिबीमा सूचीकृत छन् ।
आज वाणगंगा नगरपालिका वडा नम्बर ६ का ११४ घरपरिवार मध्ये ७२ घरपरिवारलाई उक्त गरिबी परिचय पत्र वितरण गरिएको हो । २९ अति गरिब, २६ मध्यम र १७ सामान्य गरी जम्मा ७२ घरपरिवारलाई उक्त गरिबी परिचय पत्र वितरण गरिएको नगर प्रवक्ता विष्णु पौडेलले जानकारी दिए । वडा नं ६.को वडा कार्यालय कार्यक्रम सम्पन्न भएको थियो । परिचय पत्र पाएपछि सर्वसाधारणहरूले खुसी व्यक्त गरेको र परिचय पत्र मात्र नभई राहत छिट्टै पाउनुपर्ने बताएका छन् ।
वडामा वितरण गर्दा अनुपस्थित भई गरिबी परिचय पत्र वितरण गर्न नसकिएका घरपरिवारलाई यही साउन २९ गते पछि नगरपालिकाबाट वितरण गर्ने नगरपालिकाले जनाएको छ ।
कार्यक्रममा नगर सामाजिक विकास शाखाका शाखा अधिकृत मधुकृष्ण पौडेल, लक्ष्मी पौडेल, दीपा केसी, वडा अध्यक्ष सुक देव थारु, वडा सदस्यहरू लगायतको सहभागिता रहेको थियो । परिचय पत्र वितरण कार्य यही साउन २८ गते वडा नम्बर ११ बाट सम्पन्न हुने जनाइएको छ । यसैबिच भोलि वडा नं.७ को वडा कार्यालय मोतिपुर मा गरिबी परिचय पत्र वितरण गरिने नगर प्रवक्ता विष्णु पौडेलले जानकारी दिएका छन् ।
