गृहपृष्ठ खबर पूर्वाधारको निरीक्षण गर्दै प्रदेश पदाधिकारी

पूर्वाधारको निरीक्षण गर्दै प्रदेश पदाधिकारी

प्रकाशित मिति:

मंसिर २१ गतेदेखि हुने राष्ट्रिय खेलकुद प्रतियोगिताको पूर्वाधारको काम तिब्र गतिमा भैरहेको छ । नेपालगंजसहित पाँच नम्बर प्रदेशका विभिन्न स्थानहरूमा आयोजना हुने प्रतियोगिताको लागि स्थानीय आयोजकलाई छोटो समयमा धेरै र गुणस्तरीय पूर्वाधार निर्माण गर्नुपर्ने चुनौती आइपरेको छ । दाङ्ग, बाँके, बर्दिया, रूपन्देही, कपिलबस्तुमा प्रतियोगिताहरू संचालन गर्ने गरि पूर्वाधारको काम भैरहेको प्रदेश नं. ५, खेलकुद विकास समितिका अध्यक्ष भिम वलीले बताए । आवश्यक पूर्वाधार निर्माणको कामसंगै गुणस्तरलाई समेत ध्यान दिएको उनले बताए । ‘बजेटको कामलाई प्रभावकारी र दिगो बनाउन निरन्तर अनुगमन गरिरहेका छौं,’ उनले भने । सबै कामहरू तिव्र गतिमा भैरहेको उनले बताए । प्रतियोगितामा कुल ३५ खेलहरू हुने छन् । रूपन्देहीमा लन टेनिस कोर्ट, बडिबिल्डिङ्ग र तेक्वाण्डो प्रतियोगिता हुने पक्का भएको उनले बताए । लन टेनिस कोर्ट निमार्ण गर्न ७० लाख, कञ्चन गाउँपालिकाको झुमावार खेलमैदानमा १५ लाख र भैरहवाको खेलकुद कवर्ड हल मर्मत गर्न ९ लाख बजेट खर्च भैरहेको उनले बताए ।
ईन्जिनियर कार्म बहादुर शाहीले पूर्वाधारको करीब ५० प्रतिशत काम पुरा भएको बताए । ‘नेपालगन्ज रंगशालामा पौडी पोखरी निर्माण सकिएको छ,’– उनले भने । यसैगरि सुटिङ्ग रेन्ज र भारोत्तोलन एकेडमीको काम अन्तिम चरणमा रहेको उनले दाबी गरे । कोहलपुर क्रिकेट खेल मैदान बर्दिया गुलरियास्थित कवर्ड हल र खेल मैदान, बाकेको कारकादोमा जुडो, सितापुरमा भलिबल स्टेडियमको काम तिव्र गतिमा भैरहेको उनले बताए ।
‘आठौको लागि श्रोत सुनिश्चितता अन्तर्गत १२ करोड ४१ लाख ७९ हजार बजेट आएको हो,’– उनले भने । देशभरका १२ जिल्लाका २९ स्थानमा पूर्वाधार निमार्णमा यो बजेट खर्च भैरहेको उनले बताए । काठमाडौं, झापा, रूपन्देही, कास्की, मकवानपुर, कञ्चनपुर, नुवाकोट, बाँके, बर्दिया, पाल्पा, दाङ्ग र कपिलबस्तु जिल्लामा पूर्वाधार बनिरहेको छ ।
पाँच नम्बर प्रदेशको राजधानी रूपन्देहीमा समेत धेरै खेलहरू हुने सम्भावना रहेको जिल्ला खेलकुद विकास समितिका अध्यक्ष योग गुरुङ्गले बताए । ‘हामीले १२ खेल आयोजना गर्ने प्रस्ताव गरेका छौं,’– उनले भने । क्रिकेट, बक्सिङ्ग, मार्शल आर्ट, लन टेनिससहितको १२ खेल आयोजनाका लागि सक्षम रहेको जानकारी दिएको भन्दै उनले रूपन्देहीमा पूर्वाधारको समस्या नहुनेसमेत दाबी गरे । अधिकांश ईन्डोर खेलहरू भएकाले अधिकांश खेलहरू गर्न सकिने उनले दाबी गरे । आठांै राष्ट्रिय खेलकुद प्रतियोगिताको मस्कट हात्तिको छावा छनौट भएको छ । युवा तथा खेलकूद मन्त्री राजेन्द्रकुमार केसीले मस्कट सार्वजनिक गरेका हुन् ।

सम्बन्धित् समाचार