कपिलवस्तुमा जिल्लस्तरीय बहुवर्षीय योजनाहरू अलपत्र परेका छन् । संघीय सरकारले केन्द्रबाट बिनियोजन गरिएका बजेट तथा दायित्व प्रदेशलाई अख्तियार गर्दा योजनाहरू अलपत्र परेका हुन् । अर्थ मन्त्रालयले बहुवर्षीय योजना अन्तर्गतका मुख्य सडकको बजेट प्रदेश सरकारको मातहतमा हुने गरी अख्तियारी दिँदा निर्माण कार्य ठप्प भएको हो । कपिलवस्तुमा निर्माणाधीन बहुवर्षीय योजनाका सडकको निर्माण कार्य सोही कदमका कारण रोकिएका छन् ।
क्षेत्रीय तथा पर्यटकीय महत्वका जिल्लाका ५ वटा मुख्य सडकको बजेट केन्द्रबाट विनियोजन नभएको भन्दै सडक विभागले उक्त कार्य रोक्न निर्देशन दिएको छ । योजना अघि नबढाउन मन्त्रालयले पत्राचार गरेसँगै निर्माण कार्य रोकिएको हो। बहुवर्षीय योजनाका सबै सडकको दायित्व तथा बजेट प्रदेश सरकारलाई दिएपछि विभागले उक्त कार्य नगर्न अर्थ मन्त्रालयले निर्देशन दिएको हो ।
सडक डिभिजन शिवपुर कपिलवस्तुमार्फत बहुवर्षीय सडकको काम नगर्न र सबै सडक प्रदेश सरकारलाई हस्तान्तरण गर्न डिभिजन शिवपुरलाई विभागले पत्राचारसमेत गरेको छ । पूर्व–पश्चिम राजमार्गसँग जोडेर बुद्धको राजदरबार तिलौराकोट जोड्ने (तिलौराकोट–लक्ष्मणघाट–कोइली बनगाई), (बैदौली–देउवापार–कोपवा), (पकडी–जयनगरा), (चाकरचौडा–गौरा–पिपरा–सिसहनिया) र (बर्रो्हिया–पचेहरा) सडक निर्माण अहिले रोकिएका छन् । भौतिक पूर्वाधार तथा यातायात मन्त्रालयले गत कात्तिक ५ गते पत्राचार गरेलगत्तै निर्माण कार्य रोकिएको छ ।
बहुवर्षीय ठेक्कामार्फत निर्माणाधीन अवस्थामा रहेका ती सडकमा अर्थ मन्त्रालयले थप बजेट प्रदेशमा पठाएको हुँदा उक्त सडक प्रदेशले हेर्ने सडक डिभिजन शिवपुरले जनाएको छ । उक्त सडक योजनाहरूमा अब आफूहरुको कुनै पनि जिम्मेवारी नरहेको डिभिजन प्रमुख इन्जिनियर ईश्वर बहादुर रिजालको भनाइ छ ।
