गृहपृष्ठ राजनीति एक महिनाको बीचमा काँग्रेसमा ३१ हजार नवप्रवेशी

एक महिनाको बीचमा काँग्रेसमा ३१ हजार नवप्रवेशी

प्रकाशित मिति:

काँग्रेसले दोस्रो चरणको जागरण अभियान सुरु गर्नु अघि नै संघीय संरचना अनुसार आफ्ना पार्टी संरचना बनाउने भएको छ ।

पार्टी प्रवक्ता विश्वप्रकाश शर्माले बिहीबार पार्टी कार्यालयमा जागरण अभियानबारे जानकारी दिन गरेको पत्रकार सम्मेलनमा यस्तो जानकारी दिएका हुन् ।

त्यस्तै अधिवेशन हुन नसकेका भातृ संस्थाहरुलाई दोस्रो चरणको अभियान अघिनै मनोनय गर्ने जनाएको छ । नेविसंघ लगायतका भातृ संस्थाको अधिवेशन हुन सकेको छैन ।

काँग्रेसले दोस्रो चरणको जागरण अभियान आगामी भदौ २४ देखि सुरु गर्ने यसअघि नै घोषणा गरिसकेको छ ।

यसैबीच प्रथम चरणको एक महिने“हिमाल, पहाड, तराई–मधेश नेपाली काँग्रेस राष्ट्रिय जागरण अभियान” मा देशभरबाट ३१ हजार ६ सय ४२ जना पार्टी प्रवेश गरेको काँग्रेसले जनाएको छ ।
प्रवक्ता शर्माले त्यस क्रममा सत्तारुढ पार्टी एवं अन्य पार्टीहरुबाट काँग्रेसमा सो संख्यामा प्रवेश बताए ।

काँग्रेस प्रवेश गर्नेमा साधारण सदस्यतादेखि जिल्ला र गाउँ नगरमा महत्वपूर्ण जिम्मेवारी सम्हालिरहेका व्यक्तित्वहरु समेत रहेको काँग्रेसले जनाएको छ ।

नवप्रववेशीलाई पार्टीले आवश्यक प्रशिक्षणपछि उपयुक्त जिम्मेवारी प्रदान गर्ने जनाएको छ ।

काँग्रेसको प्रथम चरणको उक्त अभियान वैशाख २५ मा सुरु भएर जेठ २५ गते मा सम्पन्न भएको थियो । दोस्रो चरणको अभियान भने असोज ७ गतेसम्म चल्नेछ ।

महिना दिनमा दुई हजार बढी कार्यक्रम

जागरण अभियानको प्रथम चरणको एक महिनाको अवधिमा जिल्ला, क्षेत्र र गाउँ–नगर स्तरीय कार्यक्रमहरु सँगै अन्य विषयगत महत्वपूर्ण भेला र कार्यक्रमहरु तथा कतिपय ठाउँमा वडा स्तरीय कार्यक्रमसमेत गरी समग्रमा २ हजार भन्दा बढी कार्यक्रम आयोजना गरिएको काँग्रेसले जनाएको छ ।

प्रवक्ता शर्माका अनुसार अभियान क्रममा बैठक, भेला, आन्तरिक सभाहरु, खुला सभा, र्याली, विचार–वहस लगायत कार्यक्रम सम्पन्न भएका छन् ।

कार्यक्रमहरुमा पार्टीका विभिन्न तहका नेता, शुभचिन्तक, वुद्धिजीवी, व्यवसायी र कार्यक्रमको स्वरुप बमोजिम विविध र व्यापक सहभागिता रहेको काँग्रेसले जनाएको छ ।

अभियानलाई व्यवस्थित बनाउन ७७ जिल्लामा पार्टीको केन्द्रीय प्रतिनिधि, जिल्ला, क्षेत्र र गाउँ नगरले

आवश्यकता अनुसार खटाएका प्रतिनिधि समेत गरी सयौँ प्रतिनिधिहरु विभिन्न तहसम्म पुगेर भूमिका निर्वाह गरेका थिए ।

काँग्रेसले अभियानअन्र्तगत गाउँ–गाउँमा पुग्दा काँग्रेसप्रति जनताको आकर्षण र सरकारप्रति असन्तुष्टि देखिएको दावी गरेको छ ।

‘वर्तमान सरकारको अधिनायकवाद उन्मुख गतिविधिहरुले सरकारप्रति तीव्र बढाएको असन्तुष्टी जागरण अभियानका क्रममा देशव्यापी रुपमा प्रकट भएको छ । फेरी पनि नेपाली कांग्रेसले आफूलाई नविन ढंगले अघि बढाएर संविधान, संघीयता र सिंगो लोकतन्त्रको रक्षा एवं सम्वद्र्धनको भूमिका निर्वाह गर्नु पर्ने आम अपेक्षा देखिएको छ । सोही आशा र विश्वासको भावनाका साथ नेपाली कांग्रेसमा समाहित हुन चाहने आकांक्षा जागरण अभियान क्रममा देशव्यापी देखिएको छ’ प्रवक्ता विश्वप्रकाश शर्माले भने ।

कमजोरी आत्मासात गर्दै अघि बढ्ने 

जागरण अभियानका क्रममा पार्टीलाई घरेलु जीवन र राष्ट्रिय राजनीतिको भूमिकाका सन्दर्भमा महत्वपूर्ण सुझावहरु प्राप्त भएका जनाएको छ । सुदृढ र नविन बढाउँदै अघि बढ्न जागरण अभियान क्रममा नेता– कार्यकर्ताबाट औल्याइएका कमजोरीहरु आत्मसात गर्दै, तिनलाई क्रमशः निराकरण गर्दै अघि बढ्ने काँग्रेसको भनाई छ ।

सम्बन्धित् समाचार