दाङमा आज कोराना संक्रमित संख्याभन्दा मुक्त हुनेको संख्या बढेको छ । पछिल्लो २४ घण्टामा दुई सय ३३ जनाले कोरोनालाई जितेका छन् । जिल्लामा थप ३८ जनामा संक्रमण देखिएको आपतकालीन कार्य सञ्चालन केन्द्र दाङले जानकारी दिएको छ ।
संक्रमण मुक्त हुनेमा घोराहीका एक सय ३०, तुलसीपुरका ७१, लमहीका १५, दंगिशरणका पाँच, राप्ती र शान्तिनगर चार, चार जना, बबईका तीन र बंगलाचुलीका एक जना रहेका छन् ।
वैशाखयता जिल्लामा अहिलेसम्म पाँच हजार चार सय ४३ जना संक्रमणमुक्त भएका छन् । यस्तै, आज थप ३८ जनामा कोरोना पुष्टि भएको छ । विभिन्न प्रयोगशालामा १०० जनाको परीक्षण गर्दा १७ महिला र २१ पुरुषमा कोरोना पुष्टि भएको जिल्ला आपतकालीन कार्य संचालन केन्द्रले जनाएको छ ।
जिल्लामा अहिले एक हजार एक सय ३९ सक्रिय संक्रमित रहेका छन् भने नौ सय ९३ घरमा, एक सय ३१ सामान्य र १५ जना आईसीयुमा रहेको जानकारी दिएको छ । यहाँ वैशाखदेखि यता कोरोना संक्रमणबाट एक सय ६४ जनाको मृत्यु भएको केन्द्रले जनाएको छ ।
