नेपाली कांग्रेसका सांसद अतहर कमाल मुसलमानले भूमि समस्या समाधान आयोग विघटनप्रति प्रतिपक्षी एमालेले अफवाह फैलाइरहेको बताएका छन् ।
बिहीबार प्रतिनिधिसभा बैठकको शून्य समयमा बोल्दै उनले भने, ‘भूमिसम्बन्धी समस्या समाधान आयोगबाट बालुवाटार र भैँसेपाटीका सुकुम्बासीलाई लालपुर्जा दिन खोजिएको होइन ।’
एमालेले आफ्नै ढंगका कारण दु:ख पाएको उनले बताए । ‘बहुमत हुँदाहुँदै अल्पमतमा पुग्दै आफ्ना सांसदलाई मन्त्री बनाइदिनुपर्यो भनेर अनुनय विनय गर्नुपर्ने अवस्थामा एमाले पुग्यो,’ उनले व्यंग्य गरे ।
भूमिसम्बन्धी समस्या समाधान आयोग खारेज गरेपछि प्रतिपक्षी एमालेले सदनमा विरोध गरिरहेको छ ।
