युक्रेनले मंगलबार दुई महिना भन्दा लामो समयदेखि मारिउपोल सहरको एजोभ्स्टल स्टिल कारखानामा फसेका आफ्ना सयौँ सेनालाई उद्धार गरिएको पुष्टि गरेको छ । उपरक्षामन्त्री हान्ना मालियारले अत्यन्तै नराम्ररी घाइते भएका ५३ जना सैनिकलाई रुस समर्थित लडाकुहरूको नियन्त्रणमा रहेको नोभोआजोभ्स्क सहरमा लगिएको बताएकी छन् ।
उनले अन्य २११ जनालाई मानवीय उद्धार मार्गमार्फत लडाकुको कब्जामा रहेको अर्को सहर ओलेनिभ्कामा पुर्याइएको बताएकी छन् । रुसले यसअघि घाइते युक्रेनी फौजलाई बाहिर लाने विषयमा एउटा सम्झौता भएको बताएको थियो ।
रोयटर्सले सोमबार साँझ दक्षिणी बन्दरगाह सहर मारिउपोलस्थित विशाल औद्योगिक क्षेत्रबाट लामो समयदेखि स्टिल कारखानाको भूमिगत तल्लामा लुकिरहेका युक्रेनी फौज बोकेर गएका करिब एक दर्जन बस देखिएको जनाएको छ ।
आफ्नो भिडियो सम्बोधनमा मंगलबार युक्रेनका राष्ट्रपति भोलोदिमिर जेलेन्स्कीले भनेका छन्, ‘युक्रेनी सेना, गुप्तचर निकाय, बार्तामा संलग्न टोलिहरू, रेडक्रस तथा संयुक्त राष्ट्र संघको यस उद्धार अभियानमा सहभागिता रहेका छन् । युक्रेनलाई आफ्ना योद्धाहरू जीवित चाहिन्छ । उनीहरूलाई तत्कालै रुसी फौजले मुक्त गर्ला जस्तो छैन । यसका लागि अर्को वार्ताको आवश्यकता हुने छ ।’
