दाङ ।
मामाघरमा रहेका छोराछोरीलाई लिन जाने क्रममा खोलाले बगाएर दाङमा एक जनाको मृत्यु भएको छ । अर्का एक जना भने खोलाले बगाएर बेपत्ता भएका छन् ।
खोलाले बगाएर तुलसीपुर उपमहानगरपालिका १५ का ४८ वर्षीय मदन डाँगीको मृत्यु भएको ईलाका प्रहरी कार्यालय तुलसीपुरले जानकारी दिएको छ ।
मामाघरमा रहेका छोराछोरीलाई लिन जाने क्रममा बुधबार खैरेनी खोलाले बगाउँदा बेपत्ता भएका डाँगी बिहीबार मृत फेला परेका हुन् ।
यसैगरी, गुर्जे खोलाले बगाउँदा घोराही उपमहानगरपालिका १० निवासी ५५ वर्षीय कल्लु चौधरी बेपत्ता भएका छन् ।
गुर्जे खोला तर्ने क्रममा बुधबार बेपत्ता भएका चौधरीको खोजी भइरहेको जिल्ला प्रहरी कार्यालय दाङका प्रमुख एसपी वीरबहादुर ओलीले जानकारी दिए ।
