रानीमहलमा पत्नी राधिकासँग प्रेमिल ओली

प्रधानमन्त्री हुँदा हेलिकोप्टरबाट रानीमहलको अवलोकन गरेका उनी पत्नी राधिकासँग धित नमरेसम्म रानीमहल दरबारको मजा लिए। प्रेमको प्रतीक रानीमहल दरबारमा पुग्दा पार्टीका नेता कार्यकर्ता, शुभचिन्तक, सुरक्षा गार्ड अघिपछि पिछा छाडेनन्। निकै रोमान्टिक स्वभावका ओली पत्नी राधिकासँग सेल्फी खिच्दै रानीमहल दरबारमा रमाए। प्रेमको आनन्द लिन एकपटक रानीमहल आउन ओलीले सबैमा सार्वजनिक अपिल गरेका थिए।

‘रानीमहल हामी सबैको लागि निकै महत्वपूर्ण संरचना भएको छ। नेपालको कला संस्कृति, इतिहास, नेपालीको प्रेम सम्बन्ध, प्राकृतिक आनन्द सबै विषयबस्तुको केन्द्रविन्दुको रूपमा रानीमहल दरबार रहेको पाएँ,’ उनले प्रतिक्रिया जनाए। उनले रानीमहललाई आफू प्रधानमन्त्री हुँदा नेपालका एक सय पर्यटकीय गन्तव्यमा राखेको बताए।

ओलीको नजरमा रानीमहल दरबार प्रेमको तीर्थस्थल नै बनेको छ। जीवितमा मात्र होइन। मृत्यु भएपछि पनि प्रेम अमर हुन्छ। मरेपछि पनि प्रेम चाहिन्छ भन्ने प्रेरणा रानीमहल दरवारले सन्देश दिएको छ। वास्तविक जीवनको महत्व रानीमहल दरवारले दिएको छ,’ उनले भने।

रानीमहल दरबार घुमेर निकै खुसी मुद्रामा देखिएका पत्नी राधिका १२५ वर्ष अगाडि यस्तो ठाउँमा यति राम्रो दरवार कसरी बनाए होलान् भनेर आश्चर्यमा परिन्। ‘आजकल स-सानो कुरामा चित्त नबुझे झगडा हुन्छ। प्रेम सम्बन्ध नै तोडिन्छ। तोडिने प्रेम होइन, सधैं जोडिने, अमर रहने रानीमहल राणा खड्ग शमशेर र रानी तेज कुमारीको जस्तो प्रेम गर्नुपर्छ,’ उनले भने।

रानीमहल दरवार सरसफाई गरी चिटिक्क पारेपछि पर्यटकहरुको आगमन बढेको छ। पर्यटकीय पुर्वाधार, खानेपानी, व्यस्थित शौचालय, फ्रि वाईफाई, वरिपरि सुविधा सम्पन्न होटल, पिच बाटो भएपछि रानीमहल आर्कषक पर्यटकीय गन्तव्यको रुपमा विकास भएको छ।  प्रेमको प्रतिक रानीमहल दरवारमा केपी ओली जस्ता राजनेताहरुको आगमनले पर्यटन आगमनमा वृद्धि भएको तानसेन नगरपालिकाका प्रवक्ता यादव सिंह कार्कीले बताए।