मुगुमा तीन बच्चा र आमाको सामूहिक हत्यामा संलग्न दुवैजनाको मृतकसँग चिनजान रहेको र आफन्तको रूपमा उनीहरू घरभित्र छिरेको अनुसन्धानमा खुलेको छ।
हत्यामा संलग्न गोर्खबहादुर शाही ठकुरी र गोपाल बोहाेरा हत्याअघि ढोका ढकढकाएरै श्रीदेवी बोहाेराको घरभित्र प्रवेश गरेका थिए।
केही समय उनीहरूबीच गफसमेत भएको थियो। घरभित्र पुगेपछि साँझ कहाँ पुगेर आउनुभयो भनेर श्रीदेवीले सोधेकी थिइन्। केही समय गफ गरेपछि उनीहरूले धारिलो हतियार प्रहार गरी श्रीदेवी उनका दुई छोरा तथा एक छोरीको हत्या गरी लुटपाट गरेका हुन्।
लुटपाटमा संलग्न मुगुको पिना गाउँपालिका– ७ का गोर्खबहादुर शाही ठकुरी र गोपाल बोहाेरालाई प्रहरीले पक्राउ गरिसकेको छ। दुवैले अभियोग स्वीकार गरेका छन्।
अभियुक्तहरूले महिलाको मात्र हत्या गर्ने योजना रहेको बताएका छन्। ‘हामी जाँदा बच्चाहरू सुतिसकेका छन् भन्ने लागेको थियो, तर बच्चाहरू सुतेका रहेनछन्,’ सोधपुछमा उनीहरूले प्रहरीसँग भनेका छन्, ‘बच्चाहरूले पनि हामीलाई चिन्ने भएकाले उनीहरूलाई पनि मारेका हौँ।’
छायाँनाथ रारा गाउँपालिका– ६ मुन्दुगाउँनिवासी २८ वर्षीया श्रीदेवी बोहाेरा, उनका ११ वर्षीय छोरा मनोज, सात वर्षकी छोरी अप्सरा तथा एक वर्षका छोरा रहरको गत ८ कात्तिकमा हत्या भएको थियो।
१० कात्तिकमा उनीहरूको शव प्रहरीले फेला पारेको थियो । हत्यापछि उनीहरूले साढे दुई तोलाको सुनको रिङ, २५ ग्रामको तिलहरी, चेक, लालपुर्जा र करिब ५–६ हजार नगद लुटेका थिए।
सुन उनीहरूले नेपालगन्जको सुन पसलमा लगेर बिक्री गरेका थिए। सुन बिक्रीको एक लाख ७९ हजार रुपैयाँ प्रहरीले गोर्खको कोहलपुरस्थित डेराबाट बरामद गरेको छ। मोबाइल भने सुर्खेतको बाँसघारीमा फालेको बताएका छन्।
