रुपन्देही ।
चीनको अन्तर्राष्ट्रिय बुद्धिष्ट एसोसियसनका उपाध्यक्ष युन सुङ लुम्बिनी भ्रमणमा पुगेका छन् ।
सुङलाई नेपाल-चीन मैत्री समाज लुम्बिनीले गौतमबुद्ध अन्तर्राष्ट्रिय विमानस्थलमा पञ्चकन्यासहित स्वागत गरेको छ । उपाध्यक्ष सुङको टोलीमा करिब ४० जना भिक्षुभिक्षुणी सम्मिलित छन् ।
लुम्बिनी पुगेका उपाध्यक्ष सुङले विश्व शान्तिका अग्रदूत गौतम बुद्धको जन्मस्थल लुम्बिनीको भ्रमण गर्न पाउँदा निकै खुशी लागेको बताए ।
उनले आफ्नो भ्रमणले लाखौं चिनियाँ बौद्धमार्गीहरुलाई लुम्बिनी भ्रमणमा आउन प्रेरित गर्ने विश्वास लिएको बताए ।
नेपाल-चीन मैत्री समाज लुम्बिनीका अध्यक्ष नारायणप्रसाद सापकोटाले आउँदै गरेको चिनियाँ नयाँ वर्षको राष्ट्रिय पर्वका अवसरमा हुने एक साता लामो बिदामा चिनियाँहरुलाई लुम्बिनी आकर्षित गर्न तीनै तहका सरकारले विशेष योजना र टुर प्याकेज बनाउनुपर्ने सुझाव दिए ।
ठूलो संख्यामा चिनियाँ पर्यटक भित्राउन सके समग्र रुपन्देहीको आर्थिक विकासमा टेवा पुग्ने उनको भनाइ छ ।
