भारतबाट अबैधरुपमा भित्राउँदै गरेको अवस्थामा कपिलवस्तुमा लसुन सहित दुई लाख ५० हजारका बिभिन्न सामाग्रीहरू बरामद गरिएको छ । प्रहरीले मंगलवार बिहान शुद्धोदन गाउँपालिका वडा नम्बर ५ हथिहवा दोहनी नाकाबाट मोटर साइकलमा ल्याउँदै गरेको अवस्थामा ५ सय २० केजी लसुन बरामद गरेको हो ।
३ वटा मोटर साइकलमा १३ वटा बोरामा ल्याई रहेको अवस्थामा प्रहरीले १ लाख ५६ हजार मूल्यको भारतीय लसुन बरामद गरेको इलाका प्रहरी कार्यालय पकडीका प्रहरी निरीक्षक राजीव श्रेष्ठले बताए । सुराकीका आधारमा दोहनी जाँदा प्रहरीलाई देखे पछि तस्करहरू लसुन छाडेर भागेका थिए ।
हथिहवा दोहनी नाकामा सशस्त्र प्रहरीको कार्यालय र नेपाल प्रहरीको सीमा चौकी समेत छ । तर त्यहाँ भने निर्बाध तस्करी भइरहेको भन्ने सुराकी आए पछि इलाका प्रहरी कार्यालय पकडीको टोली दोहनी पुगेको हो । यस्तै केही दिन अघि बरामद गरिएको मोबाइलका बिभिन्न सामाग्रीहरू, टायल्स, चप्पल,चिनी लगायतका गरी ८९ हजार मूल्यका गैर कानुनीरुपमा भित्राइएका सामाग्रीहरू समेत बरामद गरिएको प्रहरी निरीक्षक श्रेष्ठले बताए ।
बरामद सामाग्री सुठौली भन्सार चलान गरिएको छ । प्रहरी उपरिक्षक नवरत्न पौडेलले चाडबाडसँगै तस्करी बढेको भन्ने गुनासो आए पछि सीमा नाका क्षेत्रमा कडाई गरिएको बताए ।
