सर्लाही ।
सर्लाहीको लालबन्दी नगरपालिका–१५, देउरालीमा झगडा मिलाउन जाँदा ढुंगा लागेर घाइते वृद्धाको उपचारका क्रममा मृत्यु भएको छ । ढुंगाले लागेर घाइते भएका स्थानीय ६५ वर्षीया विष्णुमाया बोम्जनको आइतबार उपचारका क्रममा मृत्यु भएको हो ।
गत मंसिर २७ गते राति घरनजिकै भएको झै–झगडामा संलग्न व्यक्तिलाई छुट्याउन जाँदा ईश्वरपुर नगरपालिका–१२, घारिबथानका वीरबहादुर मोक्तानले प्रहार गरेको ढुंगाले लागेर टाउकोमा गहिरो चोट लागेको थियो । सोही दिन लालबन्दी–१५ को तल्लो देउरालीमा विवाहको भोज खाएर फर्किएका वीरबहादुर र अन्य व्यक्तिबीच विवाद भएपछि वृद्धा विष्णुमाया घरबाट निस्किएर विवाद भएको ठाउँमा पुग्दा घटना भएको प्रहरीले जनाएको छ ।
