गृहपृष्ठ कपिलवस्तु बिशेष श्रृङ्गीघाटलाई वन अध्ययन अनुसन्धान केन्द्रको हव बनाउन मन्त्री विक समक्ष अध्यक्ष ठकुरीको माग

श्रृङ्गीघाटलाई वन अध्ययन अनुसन्धान केन्द्रको हव बनाउन मन्त्री विक समक्ष अध्यक्ष ठकुरीको माग

प्रकाशित मिति:

सागर वि.क., वैखरी अनलाईन ।

कपिलवस्तुको बाणगंगा नगरपालिकामा रहेको श्रृङ्गीघाट सामुदायिक वन उपभोक्ता समूहका अध्यक्ष सुसिल सिंह ठकुरीले श्रृङ्गीघाटलाई नेपालकै वन अध्ययन अनुसन्धान केन्द्रको हव बनाउन माग गरेका छन् । अध्यक्ष ठकुरीले नेपाल सरकारका वन तथा वातावरण राज्यमन्त्री रुपा विक समक्ष यस सामुदायिक वनको वन क्षेत्रलाई वन अध्ययन अनुसन्धान केन्द्रको हव बनाउन माग गरेका हुन् ।

अध्यक्ष ठकुरीले आईतबार मन्त्री विकलाई वन क्षेत्रहरुको अवलोकन गराउँदै यस्तोे माग गरेका हुन् । उनले यस वन क्षेत्रलाई वन्यजन्तु संरक्षण तथा सम्बद्र्धनको हबका रुपमा समेत विकास गर्नुपर्ने बताए ।

उनले बाणगंगा नगरपालिका क्षेत्रमा हरेक बर्ष हुदैं गईरहेको नदी कटानले निकट भविष्यमा मानव बस्तीमै जोखिम आउने भएकाले अहिले नै सचेत हुनुपर्ने बिफ्रिङ्ग गरेका थिए । सो क्रममा उनले त्यसका लागि नदीको दुईतर्फ नै तटबन्ध गर्नुपर्ने बताए ।

ढोरपाटनसंग जोडिने गरि बाणगंगा करिडोर निर्माण गर्ने दिर्घकालीन योजना आफुहरुको रहेको उनले सुनाए । उनले बाणगंगा नदीबाट सौर्य उर्जाको योजनामार्फत वनमै ट्याक्की  निर्माण गर्ने योजना रहेको बताए । ’यहाँ ८ ओटा प्लट क्षेत्र छन् । सबै क्षेत्रका अग्नी रेखामा अण्डर ग्राउण्ड पाईप लाईन मार्फत प्रविधिका माध्यमबाट पानी सप्लाई गरेर आवश्यकता अनुसार डढेलो लागेको बेला निभाउन सकिन्छ,’ उनले भने ।

उनले ठाउँठाउँमा पोखरी निर्माण गरि पोखरीमा पानी संचय गरेर जीवजन्तुका लागि समेत राहात हुने बताए । सोही संयन गरिएको पानी आवश्यकता अनुसार ससना बोटविरुवामा समेत उपयोग गर्न सकिने उनले सुनाए । विस्तृत अध्ययनसहितको प्रस्तावना लिएर आफ्नो टिम मन्त्रालयमा आउने बताउँदै अध्यक्ष ठकुरीले त्यसका लागि आवश्यक बजेट विनियोजन गर्न ठोस पहल गर्न आग्रह गरे ।

अध्यक्ष ठकुरीले सामाजिक क्षेत्रमा वनले हरेक बर्ष काम गर्न आएको बताए । वृक्षरोपण, सौन्दर्यीकरण, शिक्षा, स्वास्थ्यका क्षेत्रमा वनले योजनाबद्ध रुपमा काम गरेको उनले सुनाए ।

राज्यमन्त्री विकले श्रृङ्गीघाट सामुदायिक वनले वन संरक्षण र समाज रुपान्तरणमा महत्वपूर्ण भूमिका खेलेको भन्दै खुशी व्यक्त गरिन् । उनले यद्यपी हालसम्म समग्र वन क्षेत्रलाई जनताको जीवन र आयआर्जनसंग जोड्न नसकिएको बताईन् । उनले श्रृङ्गीघाट सामुदायिक वनको सिको गर्न वनले गर्नुपर्ने आवश्यकता रहेको बताईन् ।

उनले श्रृङ्गीघाट सामुदायिक वनको युवा नेतृत्वसहितको पदाधिकारीहरुबाट आफु अत्यन्त प्रभावित भएको बताईन् । उनले यस वन क्षेत्रमा प्रत्यक्ष रुपमा आएर धेरै विषयहरुमा सिक्ने अवसर पाएको बताए ।

वन व्यवस्थापनका लागि प्रदेश सरकारसंग मन्त्रालयले सहकार्य गर्न लागेको उनले बताईन् । वन व्यवस्थापन र संरक्षण क्षेत्रमा देशका अन्य वनहरुले कपिलवस्तुको सिको गर्ने गरेको उनले बताईन् । उनले विस्तृत परियोजनासहित मन्त्रालयमा आउन आग्रह गर्दै आवश्यक सहयोग सहकार्य गर्ने प्रतिवद्धता जनाईन् ।

सोही कार्यक्रममा मन्त्री विकलाई वनले स्वागत तथा सम्मान गरेको वनकी सचिव सुष्मा खाँणले बताईन् । उनले वनका दिर्घकालीन योजनाहरु कार्यान्वयन गर्न मन्त्रालयले आवश्यक सहयोग समन्वय गर्ने विश्वास व्यक्त गरिन् ।

सम्बन्धित् समाचार