अफगानिस्तान र पाकिस्तानबिच भइरहेका बेला शनिबार जलालाबाद सहरमा एक पाकिस्तानी लडाकु जेट खसालिएको र त्यसका पाइलटलाई जीवित अवस्थामा नियन्त्रणमा लिइएको अफगान सुरक्षा निकायले जनाएका छन्।
घटनाले दुई देशबिचको द्वन्द्व थप गहिरिएको सङ्केत गरेको छ।
प्रहरी प्रवक्ता तैयब हम्मादका अनुसार जलालाबाद सहरको प्रशासनिक क्षेत्र नम्बर ६ मा उडिरहेको पाकिस्तानी लडाकु जेटलाई गोली हानी खसालिएको हो।
‘जेट खसालिएपछि पाइलटलाई जिउँदै समातिएको छ’, उनले भनेका छन्।
पूर्वी अफगानिस्तानस्थित सेनाका प्रवक्ता वाहिदुल्लाह मोहम्मदीले पनि अफगान सेनाले जेट खसालेको र पाइलटलाई नियन्त्रणमा लिएको पुष्टि गरेका छन्।
एएफपीका एक पत्रकारले जेटको तीव्र आवाज जलालाबादमा सुनिएको र त्यसपछि सहरको विमानस्थलतर्फबाट दुईवटा शक्तिशाली विस्फोटको आवाज आएको बताएका छन्।
घटनास्थल वरपर सुरक्षा व्यवस्था कडा पारिएको छ।
यस विषयमा प्रतिक्रिया माग्दा पाकिस्तानको सेना र सूचना मन्त्रालयले तत्काल कुनै प्रतिक्रिया दिएका छैनन्।
पछिल्लो समय सीमा क्षेत्रमा बढ्दो झडप र हवाई कारबाहीले दुई देशबिचको सम्बन्ध तनावपूर्ण बनेको छ।
यसअघि पाकिस्तानले शुक्रबार अफगानिस्तानको राजधानी काबुल तथा दक्षिणी सहर कान्दाहारमा हवाई आक्रमण गरेको थियो।
कान्दाहार तालिबान सर्वोच्च नेता हिबतुल्ला अखुन्दजादाको आधार क्षेत्र मानिन्छ। अफगान पक्षका अनुसार बिहीबार राति अफगान सेनाले पाकिस्तानविरुद्ध सीमा क्षेत्रमा कारबाही सुरु गरेपछि हवाई आक्रमण भएको हो।
तालिबान सरकारले भने उक्त कदमलाई अफगान भूमिमा पहिले गरिएको पाकिस्तानी आक्रमणको प्रतिउत्तर भएको बताएको छ। नयाँ घटनाक्रमले क्षेत्रीय सुरक्षामा थप अनिश्चितता ल्याएको छ र दुवै पक्षबीचको सैन्य गतिविधि अझै बढ्न सक्ने सङ्केत गरेको छ।
तीन सयभन्दा बढी अफगान सैनिक मारिए : पाकिस्तान
यसैबिच पाकिस्तानले अफगानिस्तानभित्र एक दिन लामो तोपखाना र हवाई कारबाहीमा ३०० भन्दा बढी अफगान सैनिक मारिएको दाबी गरेको इस्लामाबादबाट एपीले जनाएको छ।
बढ्दो सीमा द्वन्द्वबिच शनिबार सार्वजनिक सरकारी विवरणअनुसार अफगान सैन्य चौकी र प्रतिष्ठानहरूमा व्यापक क्षति भएको छ।
सूचनामन्त्री अत्ताउल्लाह तारारका अनुसार ३३१ भन्दा बढी अफगान तालिबान लडाकु मारिएका र ५०० भन्दा बढी घाइते भएका छन्।
पाकिस्तानले १०२ अफगान चौकी ध्वस्त पारेको, २२ कब्जा गरेको तथा ३७ स्थानमा १६३ ट्याङ्क र बख्तरबन्द सवारी साधन नष्ट गरेको दाबी गरेको छ।
सरकारी मिडियाले वायुसेनाले पूर्वी अफगानिस्तानका मुख्य सैन्य लक्ष्यमा आक्रमण जारी राखेको जनाएको छ। यस कारबाही तेहरिक–ए–तालिबान पाकिस्तान (टीटीपी) का प्रशिक्षण शिविर लक्ष्य गरी गरिएको आक्रमणपछि सुरु भएको परस्पर प्रतिआक्रमणको निरन्तरता हो।
पाकिस्तानले टीटीपी अफगान भूमिबाट सञ्चालन भइरहेको आरोप लगाइरहेको छ, तर काबुलले यो कुरा अस्वीकार गरेको छ।
अफगानिस्तानको रक्षा मन्त्रालयले भने मिरानशाह र स्पिन वाम क्षेत्रमा पाकिस्तानी सैन्य आधारमा रातभर आक्रमण गरेको ठुलो मात्रामा क्षति भएको जनाएको छ।
अफगान प्रवक्ता जबिहुल्लाह मुजाहिदले ५५ पाकिस्तानी सैनिक मारिएको दाबी गर्दै पाकिस्तानको ‘हरेक कदमको जवाफ दिइने’ चेतावनी दिएका छन्।
पाकिस्तानले यसअघि आफ्ना १२ सैनिक मारिएको जनाएको थियो। पूर्वी अफगानिस्तानका अधिकारीहरूले पाकिस्तानी आक्रमणमा कम्तीमा ११ सर्वसाधारण मारिएको आरोप लगाएका छन्।
पाकिस्तानले भने केवल सैन्य लक्ष्यमा प्रहार गरिएको र नागरिक हताहतबाट जोगिन प्रयास गरिएको दाबी गरेको छ।
द्वन्द्वका कारण तोरखाम सीमा क्षेत्रमा बसोबास गर्ने सयौँ परिवार विस्थापित भएका छन्।
केही अफगान शरणार्थीहरू सीमा पार गर्न नसकी अलपत्र परेका छन्। रमजानको उपवास महिनामा खाद्यान्न अभाव झेलिरहेका स्थानीयले युद्धविरामको माग गरेका छन्।
अक्टोबरयता जारी झडपमा दर्जनौँ सैनिक र नागरिक मारिएका छन्।
कतारको मध्यस्थतामा भएको युद्धविराम स्थायी हुन सकेन।
हाल टर्की, साउदी अरेबिया, कतार र चीनले फेरि मध्यस्थताको प्रयास गरिरहेका छन्।
कतारका राज्यमन्त्री मोहम्मद बिन अब्दुलाजिज अल-खुलाइफीले दुवै देशका विदेशमन्त्रीसँग सहमतिका लागि वार्ता गरेका छन्।
