लुम्बिनी प्रदेशमा सरकार फेरबदलको प्रयास अनुसार कांग्रेस संसदीय दलको सोमबार देउखुरीमा बसेको बैठकले ‘यथाशीघ्र’ सरकारको नेतृत्वसहित मन्त्रिमण्डल पुनर्गठन गर्ने निर्णय गरेको छ ।
दलको बैठकमा लामो छलफलपछि एमालेसँगको पूर्वसहमतिअनुसार सरकारको नेतृत्व अब कांग्रेसले गर्ने समय भएकाले कांग्रेस र एमाले दुवै दलको केन्द्रीय नेतृत्वसँग परामर्श गरेर सरकार पुनर्गठन निर्णयमा कांग्रेस पुगेको हो । यसअघि कांग्रेस र एमाले दुवै दलका प्रदेश स्तरका नेताहरूले सके सरकारको नेतृत्वसहित नभए मन्त्री मात्र भए पनि फेरबदल गर्ने प्रयास गरेका थिए । तर, त्यसमा सरकारमा रहेका एमाले र कांगेसका मन्त्रीहरूले बजेटअघि सरकार फेरबदल गर्न नहुने अडान राख्दै आएपछि तत्कालका लागि सरकारको नेतृत्व नै फेरबदल गर्ने संकट टरेको हो । तर, ‘यथाशीघ्र’ भन्ने शब्द निर्णयको माइन्युटमै लेखिएकाले कुनै पनि बेला दुवै दलले सहमति गरेर सरकार फेरबदल गर्न सक्ने कांग्रेसका एक मन्त्रीले बताए । ‘त्यो जिम्मेवार दलको नेतालाई दिइएको छ,’ ती मन्त्रीले भने, ‘बजेटअघि सरकारको नेतृत्व फेर्ने भन्ने विषय असम्भवजस्तै हो ।’
कांग्रेसमा संसदीय दलका नेता पूर्वमुख्यमन्त्री डिल्लीबहादुर चौधरी छन् । कांग्रेस संसदीय दलमा पनि उनकै नेतृत्वमा सरकारमा जाने ‘लगभग’ सहमति जुटेको छ । तर, कांग्रेसमा चौधरीसहित दाङका राजु खनाल, प्रचण्डविक्रम न्यौपाने, पाल्पाका वीरबहादुर राना, बर्दियाका जन्मजय तिमिल्सिना, प्यूठानका सरोज थापा (रोज), प्यूठानकै निमा गिरी पनि मुख्यमन्त्रीका आकांक्षी छन् । न्यौपाने, तिमिल्सिना र थापा अहिले पनि मन्त्री छन् । आकांक्षीमध्ये खनाल, न्यौपाने, राना र गिरी कांग्रेसका संस्थापन निकट मानिन्छन् । चौधरी, तिमिल्सिना र थापा भने पहिला देउवा निकट मानिन्थे । लुम्बिनीमा १८ महिना एमालेले र त्यसपछिको १६ महिना कांग्रेसले नेतृत्व गर्ने सहमति अनुसार २०८१ साउन ७ गते एमालेका चेतनारायण आचार्य मुख्यमन्त्री नियुक्त भएका थिए ।
