एजेन्सी
युरोपका विभिन्न देशहरुमा अत्यधिक गर्मी (हीटवेभ) का कारण एक हप्ताको अवधिमा १,३०० भन्दा बढीको ज्यान गएकोे विश्व स्वास्थ्य संगठन (डब्लुएचओ)ले जनाएको छ । युरोपभर तापक्रमले नयाँ–नयाँ कीर्तिमान कायम गरिरहँदा स्वास्थ्य संकट समेत गहिरिँदै गएको छ ।
डब्लुएचओका महानिर्देशक टेड्रोस अधानोम गेब्रेयससका अनुसार युरोप पृथ्वीको सबैभन्दा तीव्र गतिमा तातिरहेको महादेश हो, त्यहाँ तापक्रम विश्वको औसतभन्दा झण्डै दोब्बरका दरले बढिरहेको छ । बीबीसीका अनुसार हिजो मात्रै जर्मनीमा कोस्चेनमा ४१.७ डिग्री सेल्सियस तापक्रम मापन गरिएको छ, जुन त्यहाँको नयाँ कीर्तिमान हो ।
यसैगरी पोल्याण्डले पनि ४०.५ डिग्री सेल्सियस अहिलेसम्मकै उच्च तापक्रम रेकर्ड गरेको छ भने चेक गणतन्त्रमा ४१.१ डिग्री सेल्सियस तापक्रम मापन गरिएको छ । फ्रान्सको स्वास्थ्य मन्त्रालयका अनुसार गएको बुधवार यता मात्रै झण्डै १ हजारको ज्यान गएको छ । तीमध्ये धेरै ६५ वर्षभन्दा माथिका नागरिक रहेका छन् ।
फ्रान्सका गृहमन्त्री लरेन्ट नुनेजका अनुसार गर्मीबाट राहत खोज्ने क्रममा नदी, ताल र पोखरीजस्ता असुरक्षित जलाशयमा पौडी खेल्ने क्रममा डुबेर कम्तीमा ७४ जनाको ज्यान गएको छ । चरम गर्मीका कारण विभिन्न युरोपेली देशहरूले विशेष सावधानी अपनाएका छन् ।
विशेषज्ञहरूका अनुसार यसपटकको गर्मीको मुख्य कारण ‘हीट डोम’ नामक मौसमी प्रणाली हो । यस प्रणालीमा माथिबाट तल झर्ने तातो हावाले जमिन नजिक थप ताप सिर्जना गर्छ, बादल बन्न दिँदैन र घामको ताप अझ तीव्र बनाउँछ । डब्लुएचओले जलवायु परिवर्तनका कारण पहिले एक पुस्तामा एकपटक देखिने यस्ता चरम गर्मीका घटना अहिले लगभग हरेक वर्ष दोहोरिन थालेको चेतावनी दिएको छ ।
