साउदी अरबमा एक केन्याली आमालाई विवाहअघि बच्चा जन्माएको आरोपमा १०० कोर्रा हान्ने सजाय सुनाइएको छ ।
साउदी सरिया कानून प्रणालीअन्तर्गत विवाहविनाको यौनसम्बन्ध एक फौजदारी अपराध हो । अधिकारवादी समूहहरूले यस सजायको निन्दा गर्दै यसलाई हिंसात्मक कार्य भनेका छन् ।
४० वर्षीया एस्थर वानजा मुथोनीलाई रियादमा रहेकाे फौजदारी अदालतले गएकाे अक्टोबरमा दोषी ठहर गरेको थियो । यससम्बन्धी फैसला गएकाे महिना सुनाइएको थियो।
बेलायतको पत्रिका गार्जियन अनुसार मुथोनी घरको काम गर्ने सहयोगी र बालबालिकाको हेरचाह गर्ने कामका लागि साउदी अरब गएकी थिइन् । मुथोनीले इजिप्टेली पुरुषसँगको सम्बन्धका क्रममा गर्भवती भएको र त्यसपछि उनी देश छोडेर गइसकेको बताएकी छिन् ।
साउदी अरबमा धेरै अविवाहित महिलाहरूले बच्चा जन्माउने गरेका छन् । तर ती केन्याली महिलालाई अस्पताल लगिएका कारण घटना बाहिर आएको हो । अधिकारवादी समूहहरूका अनुसार साउदी अरबमा अविवाहित महिलाले बच्चा जन्माएको खण्डमा अस्पतालले सम्बन्धित निकायलाई जानकारी गराउनुपर्ने नियम छ ।
अविवाहितहरूमध्ये धेरैजसोले घरमै बच्चा जन्माउने हुँदा त्यसको अभिलेख नराखिने खाडी क्षेत्रमा आप्रवासी कामदारहरूको अधिकारका लागि वकालत गर्ने ’डु बोल्ड’ नामक गैरनाफामूलक संस्थाकी संस्थापक एकातेरिना पोरास सिभोलोबोभाले बताउनुभयो ।
