रुपन्देही ।
भारतमा मृत्यु भएकी भैरहवाकी विद्यार्थी प्रकृति लम्साललाई न्याय दिनुपर्ने मागसहित भैरहवामा शान्तिपूर्ण विरोध प्रदर्शन गरिएको छ । शुक्रबार सिद्धार्थ संजाल, रुपन्देहीको आह्वानमा र्यालीसहित प्रदर्शन गरी रुपन्देहीका प्रमुख जिल्ला अधिकारीलाई ज्ञापन पत्र बुझाइएको हो ।
भारतको ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयमा अध्यनरत २१ वर्षीया लम्साल गत आइतबार त्यहाँको होस्टेलमा मृत भेटिएकी थिइन् । उनको मृत्यु शंकास्पद भएको भैरहवाबासीको भनाइ छ ।
प्रकृतिको पार्थिव शरीर बुधबार राति गृहजिल्ला रुपन्देही ल्याएर राति नै अन्त्येष्टि गरिएको थियो । उनी रुपन्देहीको सिद्धार्थनगर नगरपालिका–८, बैंक कोलोनी निबासी हुन् ।
