बालेन्द्र शाह ‘बालेन’ नेतृत्वको काठमाडौं महानगरपालिकाले शुक्रबार तीनकुने, कोटेश्वर, जडीबुटीमा आन्दोलनका क्रममा सार्वजनिक सम्पत्तिबाट भएको तोडफोड र आगजनीको घटनामा पूर्वराजा ज्ञानेन्द्र शाहलाई जिम्मेवार ठहर्याएको छ । महानगरले शनिबार नै निर्णय गरी पूर्वराजा शाहलाई जरिवाना तिराउने गरी पत्र तयार गरेको छ ।
स्रोतका अनुसार, पत्र भोलि पठाइने छ । ९ वटा शीर्षक तोकेर महानगरले शाहको नाममा कुल ७ लाख ९३ हजार रुपैयाँ जरिवाना तोकेको छ ।
काठमाडौं महानगरपालिका– ३२, तीनकुनेमा आयोजना गरिएको कार्यक्रमबाट सिनामंगल क्षेत्रको सडक फोहर गरेकोमा जरिवानास्वरुप महानगरले एक लाख रुपैयाँ तिराउने भएको छ ।
उसैगरी त्यस क्षेत्रका रुख, बिरुवा, रेलिङ तोडफोड गरेबापत ४० हजार र तीनकुने आइल्याण्डमा तोडफोड गरेबापत २३ हजार गरी ६३ हजार रुपैयाँ निर्धारण गरिएको छ । बालकुमारी क्षेत्रको सडक तथा सडकपेटीमा जथाभावी फोहरमैला गरी वातावरण प्रदूषण गरेकोमा एक लाख रुपैयाँ तोकिएको छ ।
यस्तै, जडीबुटी सडक तथा सडकपेटीमा फोहर गरेकोमा एक लाख रुपैयाँ जरिवाना तिराइने भएको छ ।
तथा सडकपेटीमा फोहोर महादेवस्थान क्षेत्रको सडकमा फोहोर गरेकोमा एक लाख, कोटेश्वर क्षेत्रको सडक गरेकोमा एक लाख, तीनकुने क्षेत्रमा आगो निभाउन गएको दमकल र अग्नि नियन्त्रकलाई क्षति पुर्याएकोमा १ लाख ३० हजार रुपैयाँ जरिवाना तोकिएको छ । यसअघि पूर्वराजाको स्वागतमा भन्दै अघिल्लो साता एयरपोर्ट क्षेत्रमा फोहोर गरेकोमा बालेनले राप्रपालाई जरिवाना तिराएका थिए ।
