टी-२० विश्वकपमा आज समूह- १ मा रहेका टीमबीच प्रतिस्पर्धा हुँदैछ। प्रतियोगितामा वेस्टइन्डिज र दक्षिण अफ्रिका दिउँसो ३:१५ मा अहमदाबादमा प्रतिस्पर्धा गर्दा साँझ चेन्नइमा जिम्बाब्वे र भारत भिड्दै छन्।
जारी प्रतियोगितामा वेस्टइन्डिज र दक्षिण अफ्रिकाबिचको खेलबाट एक टिमले विश्वकपको सेमिफाइनलमा स्थान बनाउँदा अर्को खेलमा भने भारतलाई जित्नै पर्ने दबाब रहेको छ। आफ्नो पहिलो खेलमा भारत दक्षिण अफ्रिकासँग ७६ रनको फराकिलो अन्तरले पराजित भएकाले प्रतियोगितामा कायम रहन पनि जित्नै पर्ने दबाब आयोजक भारतलाई रहेको छ।
त्यस्तै, जिम्बाब्वे पनि भारतलाई हराएर आफ्नो सनसनिपूर्ण यात्रालाई निरन्तरता दिने प्रयासमा मैदान उत्रिँदै छ। जिम्बाब्वेले समूहचरणमा अस्ट्रेलियालाई पराजित गरेर घर पठाएकाले भारत सशंकीत छ।
त्यसोत पहिलो खेलमा जिम्बाब्वे वेस्टइन्डिजसँग १ सय ७ रनको फराकिलो अन्तरले पराजित भएकाले भारत पनि फराकिलो जितको लक्ष्यमा छ। तर भारतलाई सहज भने हुनेछैन। दक्षिण अफ्रिकासँग उसको जितको श्रृंखलामा ब्रेक लागेकाले पुनरागमन गर्नुपर्ने चुनौती छ।
अर्कोतर्फ वेस्टइन्डिज र दक्षिण अफ्रिका दुवैको राम्रो रनरेट रहेकाले भारतलाइ सेमिफाइनल यात्रा बलियो बनाउनलाई फराकिलो जित आवश्यक छ।
तालिकाको शीर्ष स्थानमा रहेको वेस्टइन्डिजले ५.३५ को नेटरनरेटमा २ अंक जोड्दा दक्षिण अफ्रिकाले ३.८० को रनरेटमा २ अंकसहित दोस्रो स्थानमा छ।
भारत र जिम्बाब्वे माइनसमा रहेकाले पनि जित निकाल्दा फराकिलो जितको लक्ष्य हुनेछ।
