पाल्पा — कालीगण्डकी नदीमा पौडी खेल्ने क्रममा बेपत्ता भएका दुई किशोर मृत फेला परेका छन् । बिहीबार बेलुकी पाल्पाको बगनासकाली गाउँपालिका–६ शिखरडाँडा घरभएका २४ वर्षीय पुजन गाहा र १४ वर्षीय शिशिर गाहा सोही वडाको मन्द्रानस्थित कालीगण्डकी नदीमा पौडी खेल्ने क्रममा डुबेर बेपत्ता थिए ।
प्रहरी, सशस्त्र प्रहरीका साथै स्थानीयको सहयोगमा खोजी गर्ने क्रममा कालीगण्डकीकै तल्लो भागमा शुक्रबार शव फेला परेको हो । शिशिरको सोही स्थानमा र पुजनको टिपुवाघाटमा शव फेला परेको जिल्ला प्रहरी कार्यालय पाल्पाका सूचना अधिकारी डीएसपी भीमलाल भट्टराईले बताए ।
कालीगण्डकी नदीमा पानी धमिलो भएका कारण खोजीमा समस्या भएको थियो । बगनासकाली–७ दैलातुङमा यसअघि नयाँ वर्ष मनाउन गएका दुई युवाकोसमेत डुबेर मृत्यु भएको थियो ।
